पोखरा ।
नेपाल रेडक्रस सोसाइटी कास्कीले मातहतका उपशाखाको क्षमता अभिवृद्धि गर्न रेडक्रस इन्डक्सन र कार्यालय व्यवस्थापन तालिम दिएको छ ।

विश्व रेडक्रस दिवस (८ मार्च)को सन्दर्भमा संगठन विकास समितको संयोजनमा भएको तालिममा कास्कीका ४५ उपशाखाका सभापति तथा सचिव, जिल्ला शाखाका पदाधिकारी तथा कार्यसमितिका सदस्य र कर्मचारी गरी १ सय २ जनाको सहभागिता थियो ।

कार्यक्रममा रेडक्रस सोसाइटी कास्कीका कोषाध्यक्ष मोहनसिंह खड्काले रेडक्रसको सिद्धान्त, अभियान र मुल्य मान्यताका बारेमा सहजीकरण गरेका थिए । पोखरा जेसिसका अध्यक्ष भाइराजा रानाले बैठक सञ्चालन विधि र माइन्युट लेखन, पत्रकार श्याम कुँवरले समाचार लेखन, रेडक्रसकर्मी नवराज भण्डारीले प्रतिवेदन लेखन विषयमा सहजीकरण गरेका थिए ।

रेडक्रस सोसाइटी कास्कीका सभापति उर्मिला खड्काले विपद् व्यवस्थापन, मानवीय सेवामा काम गर्ने संस्था रेडक्रसले सबै उपशाखाका सवलीकरणमा ध्यान दिने बताइन् । उनले मनसुनजन्य प्रकोपको सुरुवात हुन लागेको अवस्थामा विपद्को पूर्व तयारीमा ध्यान दिन आग्रह गरिन् ।

रेडक्रस कास्कीका निवर्तमान सभापति डण्डराज शर्मा पौडेलले सेवा केन्द्रको रुपमा वडा वडामा रहेको उपशाखाको क्रियाशीलता र गतिविधिले कास्की शाखालाई बलियो बनाएको बताए ।

रेडक्रस कास्कीका मन्त्री सन्तोष अधिकारीले हरेक वडा कार्यालयले विपद् व्यवस्थापनको क्षेत्रमा ५ देखि १० प्रतिशत बजेट विनियोजन गर्ने भएकोले समन्वय गरेर काम गर्न सुझाव दिए । उनले विश्व रेडक्रस दिवस सरसफाई, रक्तदान, वृक्षरोपण लगायतका सिर्जनात्मक र रचनात्मक कार्यक्रम गरी मनाउन सबै उपशाखालाई परिपत्र गरेको जानकारी दिए ।

उनले जुनियन तथा युवा सर्कललाई समेत हाजिरी जवाफ, बक्तृत्व कला प्रतियोगिता गर्न आग्रह गरेको बताए । उनले जुनियर तथा युवा सर्कलले रेडक्रसको सन्देश मुलक नारा लेखेको व्याज वितरण गरेर आम्दानी गर्न सक्ने उल्लेख गरे ।

‘मानवताको पक्षमा’ भन्ने नाराका साथ भएको कार्यक्रममा रेडक्रस सोसाइटी कास्कीका उपसभापति रमा कोइराला न्यौपाने, उपमन्त्री डिल्लीराम बराल, कार्यालय प्रमुख कृष्णप्रसाद कोइरालाले विश्व रेडक्रस दिवसको बारेमा चर्चा गरेका थिए ।