पोखरा ।

कास्की जिल्ला क्रिकेट संघको आयोजनामा सञ्चालित यु १६ विद्यालयस्तरी टी २० क्रिकेट प्रतियोगिताको दोस्रो दिन बुधबार हिमालयनले दोस्रो जित निकाल्ने क्रममा हावर्ड एकेडेमीलाई १ सय १० रनले पराजित गरेको छ ।

पोखरा रंगशाला क्रिकेट मैदानमा भएको प्रतिस्पर्धामा टस जितेर ब्याटिङको आमन्त्रणसँगै क्रिज छिरेको हिमालयनले १४६ रनको योगफल तयार पा¥यो । सफल थापाले सर्वाधिक ४३ रनको योगदान दिँदा आयुष पनेरुले २० रनमात्रै जोडे । ब्याटरको भन्दा बढी रन अतिरिक्त खातामा चढ्यो । ५१ रन अतिरिक्त थपिँदा हिमालयनले विशाल योगफल बनायो ।

लजिन पुर्जाले भने १३ रन बनाए । हिमान्त चापागाँईले ३ र समीरजंग भण्डारीले पनि ३ विकेट लिए । १ सय ४७ रनको लक्ष्य पछ्याएको हावर्ड भने ३६ रनमा समेटियो । हावर्डका ब्याटरले दोहोरो अंकको रन छुन सकेनन् । सर्वाधिक हिमान्त चापागाँईले सर्वाधिक ९ रन बनाए । अतिरिक्त रन पनि २१ जोडिए पनि सामान्य योगफलमा समेटियो । सफल थापाले, सुदर्शन कोइराला र संयोग शर्माले समान ३ विकेट लिए । खेलमा सफल थापा प्लेयर अफ दि म्याच घोषित भए ।

अर्को खेलमा जनप्रिय स्कुलले कुमुदिनी होम्सलाई ७ विकेटले पराजित गरेको छ । टस जितेर ब्याटिङ गरेको कुमुदिनी होम्सले ६६ रन बनायो । ४६ रन अतिरिक्त थपिँदा केवल ब्याटरको ब्याटबाट २० रनमात्रै बन्यो । सर्वाधिक रन भने सन्जित कुवँरले बनाउने क्रममा १२ रनमा आउट भए । सम्राट रावतले २ विकेट लिए ।

झिनो लक्ष्य पछ्याएको जनप्रियले केवल ३ विकेट क्षतिमा ५.२ ओभरमा पूरा गर्‍यो । सन्देश तामाङले २१ बल खेल्दै ३० रनमा अविजित खेले । मौसम भट्टराईले १२ रनको योगदान दिए । सन्जित कुँवरले २ विकेट लिए । सन्देश तामाङ प्लेयर अफ दि म्याच घोषित भए ।