पोखरा ।
पोखराको ३ नदीपुरमा रहेको माउन्ट अन्नपूर्ण माध्यमिक विद्यालयमा पाँचौं माउन्ट अन्नपूर्ण एसइई बास्केटबल प्रतियोगिता बिहीबारबाट सुरु भएको छ । उद्घाटनका दिन ७ खेल भएको खेल संयोजक अशोककुमार शाहीले बताए ।

जस अन्तर्गत घान्द्रुक, जेपिटी, गलेश्वर नीलो, त्रिसा शक्ति समाज, वियुजि, टिजी ब्रर्दर र मर्दीखोला विजयी भएको संयोजक शाहीले जनाए । पोखरा महानगपालिका शिक्षा महाशाखाका अधिकृत जीवन रेग्मीले विद्यालयले शिक्षाको क्षेत्रमा महत्वपूर्ण भूमिका खेलेको बताए । उनले खेलकुदको माध्यमबाट विद्यार्थीमा अनुशासित र स्वस्थ हुने वातावरण सृजना हुने हुँदा खेलकुदको महत्व भएको उल्लेख गरे ।

विद्यालयका अतिरिक्त कार्यक्रम निर्देशक तजबहादुर गुरुङले विद्यालय गण्डकी प्रदेशकै पहिलो निजी स्तरबाट सञ्चालित भएको बताए । उनले एसइई दिएर बसेका विद्यार्थीको फुर्सदको समयलाई रचनात्मक कार्यमा सदुपयोग गर्ने उद्देश्यले खेलकुदको कार्यक्रम आयोजना गरिएको जनाए ।

प्रिन्सिपल सइन्द्रराज श्रेष्ठले विद्यालयले पठनपाठनसँगै खेलकुद र अन्य अतिरिक्त क्रियाकलापमा सधै जोड दिँदै यस्ता कार्यक्रमलाई निरन्तरता दिइने बताए । कार्यक्रममा पूर्वअध्यक्ष चिजकाजी गुरुङ, प्रोमोटर झम गुरुङ, समाजसेवी भूपालजङ कुवँर, नेपाल बास्केटबल संघका उपाध्यक्ष जुम गुरुङ लगायत वडा ३ मा रहेका बिभिन्न संघ, संस्थाका प्रतिनिधिका सहभागिता थियो । २० टिमको सहभागिता रहेको प्रतियोगिता १७ गतेसम्म चल्नेछ ।