पोखरा ।
नेसनल स्पोट्र्स एकेडेमीको आयोजनामा पोखरामा प्रचण्ड कप राष्ट्रिय महिला भलिबल प्रतियोगिता हुने भएको छ । अखिल नेपाल खेलकुद महासंघको सहआयोजनामा हुने प्रतियोगिता जेठ २७ देखि ३१ सम्म पोखरा रंगशाला स्थित बहुउद्देश्यि कभर्ड हलमा सञ्चालन हुने बुधबार पोखरामा पत्रकार सम्मेलन गरी जानकारी दिइएको हो ।

प्रतियोगितामा राष्ट्रिय स्तरका ६ प्रमुख महिला टिमको सहभागिता रहने अखिल नेपाल खेलकुद महासंघ अध्यक्ष शिव कोइरालाले जानकारी दिए । नेपाल आर्मी क्लब, नेपाल पुलिस क्लब, सशस्त्र प्रहरी बल, गण्डकी प्रदेश, न्यु डायमन्ड युथ स्पोट्र्स क्लब र एभरेस्ट भलिबल क्लबको सहभागिता रहने अध्यक्ष कोइरालाले बताए ।

प्रतियोगिता राउन्ड रोबिन लिगका आधारमा खेलाइनेछ । प्रतियोगिताको उपाधि विजेता टिमले ६ लाख, उपविजेताले ३ लाख र तेस्रो हुने टिमले १ लाख रुपैयाँ पुरस्कार प्राप्त गर्ने नेसनल स्पोट्र्स एकेडेमीका अध्यक्ष दीपक कोइरालाले जानकारी दिए । सर्वोत्कृष्ट खेलाडीलाई ३० हजार र विभिन्न विधाका उत्कृष्ट खेलाडीलाई जनही २० हजार प्रदान गरिनेछ ।

सहभागी टिमले ३ जना विदेशी खेलाडी समावेश गर्न पाउने व्यवस्था गरिएको एकेडेमीका अध्यक्ष कोइरालाले बताए । ‘भलिबललाई राष्ट्रिय खेल घोषणा गरिएको सन्दर्भमा हामीले यसको विकास र व्यावसायिक उचाइमा पुर्‍याउने उद्देश्यले प्रचण्ड कप सुरु गरेका हौं,’ उनले भने, ‘यो प्रतियोगिता महिला भलिबल खेलाडीको क्षमताको पहिचान र प्रवद्र्धनमा एक कोसेढुंगा बन्ने विश्वास लिएका छौं ।’

उनले आगामी वर्ष पनि प्रतियोगितालाई निरन्तरता दिने प्रतिबद्धता गर्दै फागुनसम्म पुरुष भलिबल प्रतियोगिता आयोजना गर्ने उल्लेख गरे ।