पोखरा ।
पोखरामा जारी प्रचण्ड कप राष्ट्रिय महिला भलिबल प्रतियोगिताको उपाधि लागि २ विभागीय टोली नेपाल पुलिस क्लब र शसस्त्र प्रहरी बलको एपिएफ क्लब भिड्ने भएका छन् । पोखरा रंगशाला स्थित बहुउद्देश्यीय कभर्ड हलमा शुक्रबार भएको सेमिफाइनल खेलमा पुलिसले एभरेस्ट भलिबल क्लब र एपिएफले न्यु डायमन्डलाई पराजित गरी फाइनलमा स्थानका पक्का गरेका हुन् ।

पहिलो सेमिफाइनल खेलमा पुलिसले एभरेस्ट क्लबमाथि सोझो तीन सेटमा सहज जित दर्ता गर्‍यो । पुलिसले एभरेस्ट माथि २५–१६, २५–१३ र २५–११ को जित निकालेको हो । २ हप्ताअघि पोखरामै भएको नवौं प्रधानमन्त्री कप एनभिए भलिबल प्रतियोगितामा उपाधि जितेको पुलिस पुनः दोस्रो उपाधि रक्षा गर्ने दाउमा छ ।

दोस्रो सेमिफाइनल खेलमा एनभिए कपमा दोस्रो भएको न्यु डायमन्डलाई एपिएफले सेमिफाइनलमै रोकेको छ । एपिएफले न्यु डायमन्डलाई २५–१७, २६–२४ र २५–१९ को सेटमा पराजित गर्दै फाइनलमा यात्रा तय गरेको हो ।

शनिबार हुने फाइनलमा एपिएफ र पुलिस प्रतिस्पर्धा गर्ने छ भने तेस्रो स्थानका लागि डायमन्डले एभरेस्टसँग खेल्ने नेसनल स्पोर्ट्‌स एकेडेमी अध्यक्ष दीपक कोइरालाले बताए । ६ टिमको सहभागिता रहेको प्रतियोगितामा पाल्पाको स्टेप रामपुर र घरेलु टिम गण्डकी भलिबल संघ लिग चरणबाट बाहिरिएका थिए ।

प्रतियोगितामा विजेता टिमले ६ लाख, उपविजेताले ३ लाख, तेस्रो हुने टिमले १ लाख रुपैयाँका साथमा ट्रफी मेडल र प्रमाण पत्र प्राप्त गर्ने छन् । उत्कृष्ट खेलाडीलाई ३० हजार र अन्य विधागततर्फ उत्कृष्ट प्रशिक्षक, सटर, ब्लकर, लिब्रो, सर्वर र स्पाइकरलाई जनही २० हजार रुपैयाँ पुरस्कार प्रदान गरिनेछ ।

नेपालको राष्ट्रिय खेल भलिबलको प्रवद्र्धन तथा विकासका लागि पोखरामा आयोजित प्रतियोगिता जेठ २७ गतेदेखि सुरु भएको हो ।