पोखरा ।

पोखरामा बुधबारदेखि कलेज स्तरीय क्रिकेट प्रतियोगिता हुँदै छ । पोखराका विभिन्न क्याम्पसमा रहेका क्रिकेटका प्रतिभा खोजीका लागि पोखरा महानगरपालिका क्रिकेट संघको आयोजनामा असार २४ गतेसम्म अन्तर कलेज क्रिकेट लिग कप २०८२ हुने भएको हो ।

लेखनाथ स्थित इडन हेभन क्रिकेट मैदानमा हुने प्रतियोगितामा ५ टिम सहभागी हुने आयोजक पोखरा महानगरपालिका क्रिकेट संघले जनाएको छ । कंगारु एजुकेसन कन्सल्टेन्सी प्रालिको मुख्य प्रायोजनमा हुने प्रतियोगितामा पोखरा विश्वविद्यालय (पियु), पृथ्वीनारायण क्याम्पस (पिएन), गण्डकी विश्वविद्यालय (जियु), जनप्रिय बहुमुखी क्याम्पस (जेएमसी) र पश्चिमाञ्चल इन्जिनियरिङ क्याम्पस (डब्लुआरसी)ले सहभागिता जनाउने संघ अध्यक्ष वीरेन्द्र पुनले जानकारी दिए ।
प्रतियोगिताको उद्घाटन खेलमा पृथ्वीनारायण क्याम्पस र पोखरा विश्वविद्यालय आमनेसामने हुँदै छन् । बुधबारको दोस्रो खेलमा पश्चिमान्चल इन्जिनियरिङ कलेज र गण्डकी विश्वविद्यालय प्रतिष्पर्धामा उत्रिने छन् ।

असार १९ गते पहिलो खेलमा पश्चिमाञ्चल इन्जिनियरिङ क्याम्पसले पोखरा विश्वविद्यालय तथा दोस्रो खेलमा जनप्रिय क्याम्पसले पृथ्वीनारायण क्याम्पससँग प्रतिष्पर्धा गर्ने तय छ । तेस्रो दिन असार २० गते पहिलो खेलमा पोखरा विश्वविद्यालय र जनप्रिय क्याम्पस तथा दोस्रो खेलमा पृथ्वीनारायण क्याम्पस र गण्डकी विश्वविद्यालय आमनेसामने हुनेछन् ।

चौथो दिन असार २१ गते पहिलो खेलमा पश्चिमाञ्चल इन्जिनियरिङ क्याम्पस र जनपिय क्याम्पस तथा दोस्रो खेलमा गण्डकी विश्वविद्यालय र पोखरा विश्वविद्यालय प्रतिष्पर्धामा उत्रिनेछन् । पाँचौं दिन असार २२ गते पहिलो खेलमा पृथ्वीनारायण क्याम्पस र पश्चिमाञ्चल इन्जिनियरिङ क्याम्पस तथा दोस्रो खेलमा गण्डकी विश्वविद्यालय र जनप्रिय बहुमुखी क्याम्पसबीच प्रतिष्पर्धा हुने अध्यक्ष पुनले जानकारी दिए ।

प्रतियोगिताको अन्तिम दिन असार २४ गते उपाधिका लागि फाइनल प्रतिष्पर्धा हुनेछ । जसमा लिगको पहिलो र दोस्रो स्थानमा रहेका २ टिम मैदानमा उत्रिने छन् । पोखरालाई खेलकुदको सहरका रुपमा स्थापित गर्ने, खेलकुद र संस्कृतिको प्रवद्र्धन गर्दै क्षेत्रीय तथा राष्ट्रिय स्तरमा पोखराको उपस्थिति बलियो बनाउन प्रतियोगिता आयोजना गरिएको हो ।
प्रतियोगिताको विजेताले नगद ३० हजार र उपविजेताले नगद १५ हजार पाउने छन् । सर्वोत्कृष्ट खेलाडी, उत्कृष्ट ब्याट्सम्यान, उत्कृष्ट बलर तथा हरेक खेलमा प्लेयर अफ दी म्याच घोषणा गरी ट्रफी प्रदान गरिने आयोजकले जनाएको छ ।