पोखरा ।

साफ यू-२० महिला च्याम्पियनसिपमा नेपाली टोलीले श्रीलंकामाथि लगातार दोस्रो सानदार जित निकालेको छ । बंगलादेशको ढाकामा बिहीबार भएको खेलमा नेपालले श्रीलंकालाई ७-० को फराकिलो अन्तरले पराजित गर्दै प्रतियोगिताको शीर्ष स्थानमा उक्लिएको हो ।

ढाकास्थित बसुन्धरा स्पोर्ट्स ग्राउण्डमा भएको खेलमा नेपालले सुरुदेखि नै श्रीलंकालाई दबाबमा राखेको थियो । १५औँ मिनेटमा पूर्णिमा राईले गोलको खाता खोलिन् भने ३५औँ मिनेटमा कुसुम खतिवडाले अग्रता दोब्बर बनाइन् । पहिलो हाफको अन्त्यतिर नेपाल झनै आक्रामक बन्यो । ४३औँ मिनेटमा सरिता नाथले फ्रिकिकबाट सुन्दर गोल गरिन् भने ४५औँ मिनेटमा कुसुमको प्रहारले जाली चुमेपछि नेपालले पहिलो हाफमै ४-० को आरामदायी अग्रता लिएको थियो ।

दोस्रो हाफमा पनि नेपालको गोलको वर्षा रोकिएन । ६७औँ मिनेटमा बिर्सना चौधरीले पेनाल्टीमार्फत गोल गरिन् । त्यसपछि मैदानमा चम्किएकी समिक्षा मगरले ७४औँ र ७८औँ मिनेटमा गरी दुई गोल थप्दै नेपालको जित सुनिश्चित गरिन् । खेलको अन्तिम मिनेटमा बिर्सनाले पाएको अर्को पेनाल्टी भने श्रीलंकन गोलरक्षकले बचाइन् ।

यो जितसँगै नेपालले श्रीलंकाविरुद्धका दुवै खेलमा समान ७-० को जित दर्ता गरेको छ । जितपछि ४ खेलबाट ९ अंक जोडेको नेपाल गोलअन्तरका आधारमा बंगलादेशलाई पछि पार्दै शीर्ष स्थानमा पुगेको हो । समान ९ अंक नै भएको बंगलादेशले एक खेल कम खेलेको छ र उसले आजै भुटानसँग खेल्नेछ, जसको नतिजाले अंकतालिकामा फेरि फेरबदल हुन सक्नेछ ।