पोखरा ।

पोखरामा कोरोना भाइरस (कोभिड–१९) संक्रमणबाट एक महिलाको मृत्यु भएको छ। गण्डकी प्रदेश स्वास्थ्य निर्देशनालयका निर्देशक खिमबहादुर खड्काले ७४ वर्षीया महिलाको मृत्यु भएको पुष्टि गरेका छन्।

निर्देशक खड्काले जानकारी दिएअनुसार, ती महिला ८ दिन अघि कोरोना संक्रमित पुष्टि भएपछि उपचाररत थिइन्। “७४ वर्षको महिला उपचारका लागि आउनुभएको रहेछ। ८ दिन अघि कोरोना डिटेक्ट भएको र हिजो मृत्यु भएको भन्ने आएको छ,” खड्काले भने।

हाल गण्डकी प्रदेशमा ८ जना कोरोना संक्रमित उपचाररत छन्। तीमध्ये कास्कीमा ५ जना, बागलुङमा २ जना र स्याङ्जामा १ जना रहेका छन्।

स्वास्थ्य अधिकारीहरूले सतर्कता अपनाउन सर्वसाधारणलाई आग्रह गरेका छन्। साथै, परीक्षण, खोप, र आवश्यक स्वास्थ्य सुरक्षाका उपायहरू अवलम्बन गर्न पनि सुझाव दिइएको छ।