नेपाल सडक पेटीमा भोकै नांगै बेसहारा भएर बस्न नपर्ने राष्ट निर्माण भएर औपचारिक रुपमा घोषणा हुन लागेको छ । विस २०८२सम्ममा सडकका वेवारिसे व्यक्तिहरुको व्यवस्थापन गर्ने योजना अगाडी सारेको मानवसेवा आश्रमले सडक आश्रिम मानव मुक्त राष्ट्र घोषणा वर्ष मनाउने तयारीमा जुटेको छ । मानवता प्रवद्र्धन अभियान अन्तर्गत यो वर्ष मिसन २०८२ घोषणा वर्षपनि हो ।

परिवारबाट तिरस्कृत भएर सडकमा वेवारिसे भएका व्यक्ति उपचार र पुनस्थापनको लागि कार्यरत आश्रमले सडकमा वेवारिसे व्यक्ति रहन नदिने परिकल्पना अगाडी सारेको हो । २०६९ भदौ देखि मकवानपुर हेटौडाबाट सुरुवात भएको आश्रमले सडक पेटीमा जीवन यापन गर्दै आएका बेसहारा, अभिभावक विहीन, अनाथ, अपांगता भएका व्यक्ति र मानसिक समस्याका विरामीहरुलाई उद्वार, उपचार, पालनपोषण र परिवारमा पुनर्मिलन सेवा गर्दै आएको छ । उद्वार गरिएको सबै आश्रित व्यक्तिको लागि खाना नाना छाना, शिक्षा र स्वास्थ्यको व्यवस्था गर्न अभियन्ता स्वयं सेवीहरु खटिएका छन् ।

दाताको जन्म दिन, संघ संस्थाको स्थापना दिवस, बैंक तथा वित्तिय संस्थाको संस्थागत सामाजिक उत्तरदायित्व अन्तर्गतको सहयोगबाट आश्रम चलेको छ । विदेशी दातृ निकायबाट सहयोग नलिने नेपाल र नेपालीको मौलिक कार्यक्रमबाट आश्रम सञ्चालित छ । महजात्रा, नेपथ्य ब्याण्डको कन्सर्ट लगायत नेपाललाई मानवताको राष्ट्र बनाउने अभियानलाई सघाएको छ ।
देशव्यापी रुपमा ११ हजार ८ सय ९८को उद्वार गरेको संस्थाले अहिले १ हजार ९ सय ५५ जनालाई सेवा दिएको छ । अहिलेसम्म ४ हजार ८ सय १७ जनालाई सुखद पारिवारीक पुनर्मिलन र ९ सय ७० जनालाई सामाजिक रुपमा पुनस्र्थापना गरेको छ ।

आश्रमको सडक मानव मुक्त नेपाल बनाउने अभियान कार्यान्वयन गर्न पहिला हरेक प्रदेश र स्थानीय तह सडक मानव मुक्त बन्न पर्छ । सडक मानवमुक्त प्रदेश तथा स्थानीय तह निर्माणको परिकल्पनालाई सार्थक बनाउन आश्रमसँगको सहकार्य गरेका छन् । आश्रमको भवन निर्माणका अलवा आर्थिक वर्ष २०८२/८३ मा गण्डकी प्रदेश सरकारले मानवसेवा आश्रमका विभिन्न इकाइहरूको व्यवस्थापनका लागि कुल १ करोड १८ लाख १० हजार बजेट विनियोजन गरेको छ । पोखरा महानगरपालिका, रुपा, मादी, माछापुच्छ्रे र अन्नपूर्ण गाउँपालिकाले आ–आफ्नो कार्यक्षेत्र भित्रको सडकमा रहेका आश्रय विहीन तथा सहयोगापेक्षी नागरिकको उद्वार, संरक्षण, पुनःस्थापनाका लागि आवश्यक सहयोग गरेका छन् ।

बेसहारा, अभिभावक विहीन र परिवारको तिरस्कारको कारणले मानिसले सडक पेटीमा गुजरा चलाउनु पर्ने बाध्यता छ । यो क्रम नरोकिने भएकोले सडक मानव व्यवस्थापनको काममा सरोकारवालाहरुले नियमित रुपमा खटिन आवश्यक पर्छ ।
सडक मानव मुक्त राष्ट्र घोषणा घोषणा गरेर मात्र पुग्दैन । यस्तो अभियानलाई दिगो रुपमा टिकाउन र सञ्चालन तथा व्यवस्थापनको लागि सरोकारवालाले ध्यान दिन आवश्यक छ । स्वयंसेवी भावना, समर्पण र सेवा प्रवाहको अनुपम उदाहरण बनेको आश्रमको प्रयासले आर्थिक प्रगति तथा भौतिक पूर्वाधार विकासका हिसाबले पछाडी रहेको नेपाल मानवता तथा परोपकारको दृष्टिकोणले नेपाल अब्बल रहेको सन्देश दिएको छ ।