पोखरा । गण्डकी प्रदेशसभा भवनको मंगलबार शिलान्यास गरिएको छ । गण्डकीमा प्रदेश संरचना सुरु भएको आठ वर्षपछि बन्न लागेको नयाँ भवनको गण्डकी प्रदेशमा मुख्यमन्त्री सुरेन्द्रराज पाण्डेले शिलान्यास गरेका हुन् ।

पोखरा महानगरपालिका वडा नम्बर ३ नदीपुरमा अहिलेको अस्थायी कार्यालयकै पश्चिमतर्फ २५ करोड ३७ लाख ८२ हजार आठ सय ६१ रुपैयाँ लागतमा उक्त भवन बन्ने भएको हो । सहरी विकास तथा भवन कार्यालय कास्कीले बनाएको विस्तृत परियोजना प्रतिवेदन (डिपिआर) बमोजिम भवन निर्माण हुने गण्डकी प्रदेश सभा सचिव हरिराज पोखरेलले जानकारी दिए । श्रेष्ठ एन्ड सन्स/इस्ट वेस्ट जेभी काठमाडौंले उक्त भवनको जिम्मा पाएको उनले बताए ।

२०८१ माघ १८ गते भवन निर्माणको सम्झौता भएर केही काम अघि बढिसकेको सहरी विकास तथा भवन कार्यालय कास्कीका प्रमुख ओमराज ढुंगानाले जानकारी दिए । अहिलेसम्म भवनको जमिनको सतहमुनि गर्नुपर्ने कामहरु सकिएका छन् । डिपिआरअनुसार भवनको लागत ४४ करोड ९९ लाख ६० हजार तीन सय ७६ रुपैयाँ रहेकोमा ३२.४१ प्रतिशत घटेर श्रेष्ठ एन्ड सन्सले ठेक्का पाएको हो । भवन ३ तलाको बन्नेछ ।