पोखरा ।
विश्व पर्यटन दिवसको सन्दर्भमा आउँदो असोज ४ गते शनिबार आयोजना हुने दोस्रो संस्करणको खुला पर्वतीय दौड प्रतियोगिताको तयारी तीव्र पारिएको छ । पोखरा क्लिक प्रालिको आयोजनामा हुने उक्त प्रतियोगिताको तयारी तीव्र पारिएको सोमबार पोखरामा आयोजित पत्रकार सम्मेलनमा जानकारी गराइएको हो ।

विश्वशान्ति स्तूपबाट सुरु भई पुम्दीकोट विशाल महादेवको मूर्ति परिक्रमा गरी पोखरा–२२ वडा कार्यालय हुँदै निगालेडाँडामा अवस्थित कालाबाङ घरेडी बुद्ध पार्कमा समापन हुने आठ किलोमिटर पर्वतीय दौडमा खुला, वडास्तरीय, महिला, यू–१६ र पर्यटन तथा ४० वर्षमाथिका भेट्रानतर्फको प्रोत्साहन गरी ६ वटा इभेन्ट समावेश गरिएको प्रतियोगिताका संयोजक दीननाथ बरालले बताए । अघिल्लो संस्करणका तुलनामा पुरस्कार राशि दोब्बर गरिएको छ भने दुई इभेन्ट थप गर्दै प्रोत्साहन पुरस्कारको व्यवस्था गरिएको उनले जनाए ।

प्रतियोगितामा खुलातर्फ प्रथम हुने धावकले ५० हजार नगद प्राप्त गर्नेछन् । दोस्रो, तेस्रो, चौथो र पाँचौँलाई क्रमशः ३० हजार, १५ हजार, सात हजार, तीन हजार र छैटौँदेखि दसौँ स्थानसम्म दुरी पूरा गर्ने धावकलाई जनही एक हजार नगद, मेडल र प्रमाणपत्रसहित पुरस्कृत गरिने भएको छ ।

गत वर्ष खुलातर्फको इभेन्टमा प्रथम, द्वितीय र तृतीयलाई नगद पुरस्कार क्रमशः २५ हजार, १५ हजार र सात हजार रुपैयाँ थियो । यसैगरी, वडास्तरीय, खुला महिला र यू–१६ तर्फका विजेतालाई जनही १५ हजार र उपविजेतालाई जनही सात हजार रुपैयाँसहित मेडल र प्रमाणपत्रद्वारा पुरस्कृत गरिनेछ ।

प्रतियोगितामा यस वर्ष ४० वर्षमाथिका भेट्रान र विदेशी धावकलाई प्रोत्साहन पुरस्कारको समेत व्यवस्था गरिएको छ । भेट्रान र विदेशी इभेन्टका विजेतालाई जनही १५ हजार रुपैयाँका दरले प्रोत्साहन पुरस्कार प्रदान गरिनेछ । प्रतियोगितामा सहभागी हुने खेलाडीहरूले अनलाइन फाराम भर्नुपर्नेछ, अनलाइन फाराम सोमबारदेखि खुला गरिएको प्रतियोगिताका निर्देशक ओम लामाले बताए । यही भदौ २५ गतेसम्म मात्र धावकहरूले अनलाइन फाराममार्फत आफ्नो नाम दर्ता गराउन सक्नेछन् । पोखरा क्लिक डटकममा अनलाइन फाराम भर्न सकिन्छ ।

आफ्नै क्षेत्रलाई सञ्चार र खेल पर्यटनसँग जोडेर प्रवद्र्धन गराउने उद्देश्यले प्रतियोगिता तयारी गरिएको छ,’ पोखरा क्लिक डटकमका वरिष्ठ संवाददाता असफल गौतमले बताए ।

पत्रकार सम्मेलनमा बोल्दै पोखरा २२ का वडाध्यक्ष हिमलाल बरालले उक्त इभेन्टलाई वडाले आफ्नो चाडको रूपमा लिएको बताउँदै यसको स्तरोन्नति गर्न विस्तारै हाफ म्याराथनसम्म लैजाने योजना रहेको जनाए । पोखरा पर्यटन परिषद्का पूर्वअध्यक्ष एवं अग्रज पर्यटन व्यवसायी गणेशबहादुर भट्टराईले उक्त दौडलाई आठ किलोमिटरबाट बढाउँदै हाफ म्याराथन हुँदै लेकसाइडदेखि पञ्चासेसम्मको म्याराथन दौड गर्न सुझाव दिए ।

पोखरा पर्यटन परिषद्का प्रथम उपाध्यक्ष हरिबहादुर भुजेलले विश्व पर्यटन दिवसको अवसरमा हुने उक्त प्रतियोगितामा विदेशी धावकहरू बढीभन्दा बढी सहभागी गराउन पहल गर्ने वचन दिए । नेपाल पत्रकार महासंघ कास्कीका उपाध्यक्ष माधव रेग्मीले पोखरा र पुम्दी–भुम्दीलाई विश्वसामु परिचित गराउन उक्त इभेन्टले थप मद्दत पुग्ने बताए । विश्व शान्ति स्तूप समितिका अध्यक्ष अशोक गुरुङले दौडको सुरुआत शान्ति स्तूपबाट हुने भएकोले आवश्यक व्यवस्थापनमा सहयोग गर्ने बताए ।

प्रतियोगिताका प्राविधिक ओम गुरुङले यसपालि हावा, हुरी र पानी आए पनि प्रतियोगिता निर्धारित समयमै हुने गरी तयारी हुने बताए । पोखरा २२ को वडा युवा परिषद्का अध्यक्ष दिनेश बरालले प्रतियोगिता गाउँकै नयाँ ब्रान्ड भएकोले सफल पार्न आफूहरू कटिबद्ध रहेको जनाए ।