काठमाडौं । सर्वोच्च अदालतले दीपक मनाङे (राजीव गुरुङ) लाई पदमुक्त गर्ने फैसलाको पूर्णपाठ सार्वजनिक गरेसँगै निर्वाचन आयोगले मनाङ प्रदेश सभा २ मा कात्तिक १७ गते उपनिर्वाचन गर्ने भएको छ ।

सर्वोच्चको फैसलाको पूर्णपाठ नआउँदा अन्योलमा रहेको आयोगले सोमबार फैसला सार्वजनिक भएलगत्तै उपनिर्वाचनको मिति टुङ्गो लगाएको हो । आयोगका कार्यवाहक प्रमुख निर्वाचन आयुक्त रामप्रसाद भण्डारीले रुपन्देही–३ सँगै मनाङमा पनि सोही मितिमा निर्वाचन गराउन दल दर्ता लगायतका प्रक्रिया छोट्याइने जानकारी दिए ।

‘सर्वोच्च अदालतको फैसलाले अब आयोगलाई प्रक्रिया अघि बढाउन सहज भएको छ,’ भण्डारीले भने, ‘दल दर्ता लगायतका प्रक्रिया छोट्याएर भएपनि कात्तिक १७ गते नै उपनिर्वाचन हुन्छ ।’

के छ सर्वोच्चको फैसलामा ?

प्रधानन्यायाधीश प्रकाशमानसिंह राउतसहितको संवैधानिक इजलासले गत असार ४ गते मनाङेलाई पदमुक्त गर्ने फैसला गरेको थियो । सोमबार सार्वजनिक पूर्णपाठमा ज्यान मार्ने उद्योग मुद्दामा सर्वोच्चकै संयुक्त इजलासबाट दोषी ठहर भइसकेकाले उनी प्रदेश सभा सदस्य पदका लागि अयोग्य भएको उल्लेख छ ।

फैसलाअनुसार, मनाङे गत वर्ष कात्तिक २० गते सर्वोच्चबाट दोषी ठहर भएकै मितिदेखि पदमुक्त भएका हुन् । ज्यान मार्ने उद्योग जस्तो फौजदारी कसुर ‘नैतिक पतन’ भित्रै पर्ने ठहर पनि सर्वोच्चले गरेको छ ।

‘गुन्डा नाइके’ भनेर चिनिने मनाङेले २०६१ सालमा चक्रे मिलन समूहमाथि आक्रमण गरेको अभियोगमा मुद्दा खेपेका थिए । सोही मुद्दामा उच्च अदालत पाटनले सुनाएको ५ वर्ष कैद सजायलाई गत वर्ष कात्तिक २० गते सर्वोच्चले सदर गरेको थियो । मनाङ प्रदेश सभा (२) बाट निर्वाचित उनी हाल डिल्लीबजार कारागारमा सजाय भुक्तान गरिरहेका छन् ।