पोखरा ।

गण्डकी प्रदेश प्रमुख डिल्लीराज भट्टले हरितालिका तीजलाई महिला मुक्ति र स्वतन्त्रताको भावना मुखरित गर्ने पर्वको रूपमा व्याख्या गरेका छन् । नेपाली हिन्दू महिलाहरूको महान् पर्व तीजको अवसरमा शुभकामना सन्देश जारी गर्दै उनले यस पर्वको छुट्टै महत्व रहेको बताए ।

प्रदेश प्रमुख भट्टले तीज सांस्कृतिक सहिष्णुता र सामाजिक एकताको प्रतीक भएको उल्लेख गरे । यो पर्वले नेपालीलाई एकताको सूत्रमा बाँधेर धार्मिक सहिष्णुता र सद्भाव कायम गर्ने उनको भनाइ छ । साथै, यसले एकआपसमा खुसी साटासाट गर्ने र मनोरञ्जनको अवसर दिने उनले बताए ।

‘तीज पर्वले समाजका हरेक क्षेत्रमा महिलाको समान पहुँचलाई अझ सशक्तरूपमा अघि बढाउँदै सामाजिक, सांस्कृतिक एकता तथा पारिवारिक सम्बन्धहरू थप सुमधुर बनाउन योगदान गर्ने विश्वास व्यक्त गर्दछु,’ उनले भने ।

उनले चाडपर्वसँग गाँसिएका विकृति र विसंगतिहरूलाई कम गर्दै मौलिक पक्षको जगेर्ना गर्न सम्बद्ध सबैलाई आह्वान गरे । ‘नेपाली मौलिक संस्कृति सम्वर्द्धन गर्दै संस्कारयुक्त आदर्श सामाजिक वातावरण तयार गर्न र सदाचार जीवनशैली अपनाउन अपिल गर्दछु,’ शुभकामना सन्देशमा उनले भने ।