पोखरा ।
पोखराको नयाँबजारमा ‘दोस्रो खुल्ला नयाँबजार कप भलिबल प्रतियोगिता २०८२’ बिहीबारदेखि सुरु भएको छ । नयाँबजार युवा क्लब पोखरा–९ले प्रतियोगिताको आयोजना गरेको प्रतियोगिता शनिबारसम्म चल्ने छ ।

आरम्भ स्पोर्टस् हाउस नयाँबजारको सहआयोजनामा प्रतियोगिता भएको हो । क्लबका अध्यक्ष समीर श्रेष्ठका अनुसार प्रतियोगितामा २२ वटा टिमले उपाधिका लागि प्रतिस्पर्धा गर्नेछन् ।

प्रतियोगिताको उद्घाटन खेल निकै रोमाञ्चक रह्यो । खेलमा रेडियो अकलाको टिमले आयोजक नयाँबजार युवा क्लबलाई २–१ को सेटमा पराजित गर्दै दोस्रो चरणमा प्रवेश गरेको छ । खेलले प्रतियोगिताको सुरुवातमै प्रतिस्पर्धात्मक माहोल सिर्जना गरेको छ ।

प्रतियोगिताको उद्घाटन कास्की जिल्ला खेलकुद विकास समितिका अध्यक्ष मिलन गुरुङले गरे । उद्घाटन समारोहमा बोल्दै गुरुङले भलिबल नेपालको राष्ट्रिय खेल भएको र यसको आकर्षण तथा महत्व दिन प्रतिदिन बढ्दै गइरहेको बताए ।

उनले नयाँबजार युवा क्लबले आयोजना गर्ने भलिबल लगायतका खेलकुद गतिविधिमा समितिको सधैं सहयोग रहने प्रतिबद्धता व्यक्त गरे । अध्यक्ष गुरुङले क्लबसँगको समन्वयमा खेलकुदका गतिविधिहरू अगाडि बढाउने र क्लबले आयोजना गरेको प्रतियोगितालाई समितिले सकारात्मक रूपमा लिएको जानकारी दिए ।

‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ सुरु भएको यो प्रतियोगिता भदौ १२ गतेदेखि १४ गतेसम्म सञ्चालन हुनेछ । प्रतियोगिताका संयोजक विनोद रामदामका अनुसार विजेता, उपविजेता र तेस्रो स्थान हासिल गर्ने टिमलाई आकर्षक नगद पुरस्कारको व्यवस्था गरिएको छ ।

प्रथम हुने टिमलाई ३० हजार, द्वितीय हुने टिमलाई २० हजार र तृतीय हुने टिमलाई १० हजार नगद पुरस्कार प्रदान गरिनेछ । प्रतियोगिताले स्थानीयस्तरमा खेलकुदको विकास र खेलाडीहरूलाई प्रोत्साहन गर्न महत्वपूर्ण भूमिका खेल्ने अपेक्षा गरिएको छ ।