पोखरा । पोखरामा हुने दोस्रो वात्सल्य एभरेस्ट महिला भलिबल लिग (इडब्लुभी) को ट्रफी सार्वजनिक गरिएको छ । भदौ २० देखि २८ सम्म पोखरा रंगशाला स्थित बहुउद्देश्यीय कभर्ड हलमा हुने प्रतियोगिताको ट्रफी बाराहीघाटमा पोखरा महानगरपालिकाका प्रमुख धनराज आचार्यले सार्वजनिक गरेका हुन् ।

पोखरा भ्रमण वर्ष २०२५ को सन्दर्भमा पोखरामा आयोजना हुने भलिबल लिग पोखराका लागि निकै महत्वपूर्ण हुने नगर प्रमुख आचार्यले बताए । ‘पर्यटकीय राजधानी पोखरा खेल पर्यटनको पनि हब सिटी हो, उनले भने, ‘यसले पोखराको पर्यटनलाई थप उचाइमा पु¥याउन र महिला भलिबल हेर्ने पोखरेली दर्शकको चाहना पूरा गर्ने छ ।’

प्रतियोगितामा ६ फ्रेन्चाइज टोली काठमाडौँ स्पाइकर्स, ललितपुर क्विन्स, कर्णाली यसबिस, मधेस युनाइटेड, पोखरा निन्जाज र लुम्बिनी लाभाले उपाधिका लागि प्रतिस्पर्धा गर्ने छन् । पोखरा निन्जाजले पर्यटकीय राजधानी पोखराको प्रतिनिधित्व गर्ने छ । त्यसअघि बिहीबार साँझ पोखराको लेकसाईडमा नगर प्रमुख नेतृत्वको टिम धनराज र महानायक नेतृत्वको टिम राजेशका बिचमा मैत्रीपूर्ण भलिबल हुनेछ ।