काठमाडौँ । सरकारले वर्तमान परिस्थिति तथा चाडपर्वको समयमा यात्रुको यात्रा सुरक्षित र सहज बनाउन, साथै प्राप्त गुनासोको तत्काल सम्बोधन गरी यातायात व्यवस्थापनमा सहजीकरण गर्न उच्चस्तरीय यातायात व्यवस्थापन समिति गठन गर्ने निर्णय गरेको छ ।

आज भौतिक पूर्वाधार तथा यातायात मन्त्रालयका सचिव केशवकुमार शर्माको अध्यक्षतामा बसेको बैठकले यातायात व्यवस्था विभागका महानिर्देशकको संयोजकत्वमा समिति गठन गर्ने र छबुँदे निर्णय गर्ने निर्णय गरेको हो ।

समितिमा नेपाल प्रहरी प्रधान कार्यालय, राजमार्ग सुरक्षा महाशाखा प्रमुख, काठमाडौँ उपत्यका ट्राफिक प्रहरी कार्यालय प्रमुख, यातायात व्यवसायी राष्ट्रिय महासंघका अध्यक्षसहित सरोकारवाला प्रतिनिधि सहभागी हुनेछन् ।

बैठकले चाडपर्वका दिन उपत्यकाबाट बाहिर जाने सवारीसाधनको प्राविधिक जाँच गर्ने र आवश्यकताअनुसार यात्रु सहायता कक्ष निर्माण गर्ने निर्णय पनि गरेको यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले जानकारी दिए ।

उनका अनुसार, बैठकले वर्तमान परिस्थिति तथा चाडपर्वमा उपत्यकाबाट बाहिरिने यात्रु सहजै गन्तव्यसम्म पुग्न सक्ने गरी यातायात व्यवस्थापन गर्न नेपाल यातायात व्यवसायी राष्ट्रिय महासंघसहित सरोकारवालालाई अनुरोध गर्ने निर्णय गरेको छ ।

त्यस्तै, आन्दोलनका क्रममा क्षति भएका सार्वजनिक सवारीसाधन र कार्यालयको यकिन गरी क्षतिपूर्तिका लागि आवश्यक प्रक्रिया अघि बढाउने, ट्राफिक प्रहरीलाई आवश्यक सामग्री मन्त्रालय र सडक सुरक्षा परिषद्ले उपलब्ध गराउने निर्णयसमेत भएको छ ।

यसबाहेक, आन्दोलनका क्रममा लुटपाट भएका हतियारलगायत सामग्री सवारीसाधनमार्फत ओसारपसार हुन नपाउने गरी तत्काल सूचना जारी गर्ने निर्णय भएको सिटौलाले जानकारी दिए ।