काठमाडौं । नेपाली राष्ट्रिय क्रिकेट टोलीका लेगस्पीनर सन्दीप लामिछानेलाई वेस्ट इन्डिजविरुद्धको सिरिजअन्तर्गत बाँकी २ खेलका लागि निलम्बन गरिएको खुलेको छ । नेपाल क्रिकेट संघ (क्यान)ले बुधबार साँझ विज्ञप्ति जारी गर्दै सन्दीपको निलम्बनको जानकारी दिएको हो ।

क्यानका अनुसार सेप्टेम्बर २७ मा पहिलो खेल सुरु हुनुभन्दा करिब ४५ मिनेटअघि सन्दीपले आफैं नखेल्ने निर्णय गरेका थिए । उनको यस्तो आकस्मिक निर्णयले टोली व्यवस्थापन, अन्य खेलाडी तथा समग्र नेपाली क्रिकेटमा गम्भीर असर परेको क्यानका सचिव पारस खड्काले जारी गरेको विज्ञप्तिमा उल्लेख छ ।

त्यसपछि व्यवस्थापनको सिफारिसमा सन्दीपलाई बाँकी खेल तथा पूरै सिरिजका लागि निलम्बन गरिएको जनाइएको छ । तर उनले किन नखेल्ने निर्णय गरे भन्नेबारे भने अझै खुलाइएको छैन ।

यसबीचमा सामाजिक सञ्जालमा यस विषयमा विभिन्न चासो र टिकाटिप्पणी भइरहेका बेला क्यानले आधिकारिक विज्ञप्ति सार्वजनिक गरेको हो ।

यद्यपि ओमानमा हुने टी-२० विश्वकप छनोटका लागि भने सन्दीपलाई टोलीमा राखिएको क्यानले स्पष्ट पारेको छ । नेपाली टोली ओमानका लागि प्रस्थान गरिसकेको समेत जानकारी दिइएको छ ।