पोखरा ।
लेकसाइडमा रहेकाे होटल सरोवरमा गत भदौ २४ गते राति जेन–जी आन्दोलनको नाममा अराजक समूहले तोडफोड र आगजनी गरे । घटनापछि होटलका सञ्चालक प्रतीक पहारीले देशको राजनीतिक परिस्थितिबारे भावनात्मक विचार प्रकट गरेका छन् । बुधबार पोखरा उद्योग वाणिज्य संघले आयोजना गरेको अन्तक्र्रिया कार्यक्रममा बोल्दै प्रतीकले त्यो रातको घटना केबल व्यवसायमाथिको आक्रमण नभई देशकै आर्थिक स्थायित्वमाथिको चुनौती भएको बताएका छन् ।

उनकाे सम्पादित भनाइः

देशमा प्रथम महिला प्रधानमन्त्री चयन हुनु गौरवको कुरा हो । म आशा गर्छु कि जेन–जी साथीहरूको आन्दोलनको मर्मलाई बुझी उहाँले देशलाई सही दिशातर्फ लैजानुहुनेछ । म विश्वास गर्छु कि देशमा शान्ति र सुशासन कायम हुनेछ र देशमा उद्यम गर्न सहज वातावरण बन्नेछ, साथै अन्य प्रभावितहरूलाई पनि नयाँ अवसर मिल्नेछ । युवाहरूको आक्रोश जायज थियो — भ्रष्टाचार र बेथिति निकै बढेको थियो । तर आन्दोलन शान्तिपूर्ण हुन आवश्यक थियो । युवाहरूको ज्यान गुम्नु अत्यन्त दुःखद घटना हो, तर युवाहरूको नाममा भएको अराजकता र तोडफोड पनि त्यत्तिकै पीडादायी भयो । म यस आन्दोलनमा सहादत प्राप्त गर्नुभएका युवाप्रति हार्दिक समवेदना प्रकट गर्न चाहन्छु । त्यस्तैगरी, यस अराजक घटनामा ज्यान गुमाउनुभएका नागरिकहरूप्रति पनि श्रद्धाञ्जलि अर्पण गर्दै गहिरो समवेदना व्यक्त गर्दछु । साथै, राज्यका संरचना र व्यवसायहरूमा भएका लुटपाट, तोडफोड र आगजनीको पनि भत्र्सना गर्दछु । यसै सन्दर्भमा, भदौ २४ गते हामीले सञ्चालन गर्दै आइरहेको होटल सरोवरमा पनि तोडफोड र आगजनी गरियो । जेन–जीको नाममा आएका केही आपराधिक र अराजक समूहहरूले नियोजित ढंगले होटलमा तोडफोड, लुटपाट र आगजनी गरे । उनीहरू हातहतियारसहित आएका थिए । यस्ता कठिन क्षणमा हाम्रा कर्मचारीहरूले १२० भन्दा बढी पाहुनाहरूलाई सुरक्षित स्थानमा लैजानुभयो र रातभर आगो निभाउन लागिपर्नुभयो । उहाँहरूको प्रयास साँच्चिकै प्रशंसनीय र प्रेरणादायी छ । तर दुःखको कुरा, सुरक्षा निकायबाट कोही पनि सहायता गर्न आएनन् । रातभर होटल जलिरह्यो । सुरक्षा संयन्त्रको निष्क्रियताले राज्य अराजक अवस्थामै पुगेको प्रमाण दियो । पाहुनाहरूको करिब ५० लाख रुपैयाँभन्दा बढी मूल्यका सामग्री नष्ट भए, र होटल स्वयं अरबौं मूल्य बराबरको क्षति बेहोर्नु परेको छ । यो हिंसात्मक गतिविधिले हामी मात्र होइन, देशभरका अन्य व्यवसायीहरूलाई पनि ठूलो क्षति पु¥याएको छ । यस्ता अन्याय भविष्यमा अरूलाई नहोस् भनेर सबै सजग हुनुपर्छ । म आशा गर्दछु कि नयाँ सरकारले न्यायपूर्ण र सुरक्षित समाज निर्माणमा अग्रसर हुनेछ । पादरी मार्टिन निएमोलरले भनेझैं — ‘पहिला उनीहरू समाजवादीहरूका लागि आए, म बोलिनँ; त्यसपछि ट्रेड युनियनिस्टका लागि आए, म फेरि पनि मौन रहेँ; अनि जब उनीहरू मलाई लिन आए त्यसबेला — मेरा लागि बोल्ने कोही बाँकी रहेन ।’ यदि हामीले अरूको अन्यायमा मौन बस्यौं भने, हाम्रो पालो आउँदा हाम्रो पक्षमा को बोल्ने ? यही कुरा गम्भीर रूपमा बुझ्न आवश्यक छ । आज जसरी व्यवसायहरूमा आगजनी भयो, भोलि तपाईँ–हामीमाथि पनि त्यस्तै हुन सक्छ — यो साँच्चिकै डर लाग्दो कुरा हो । व्यवसाय गर्नु आफैंमा चुनौतीपूर्ण हुन्छ । विशेषगरी हाम्रा जस्ता देशमा, जहाँ मानिसहरूले आफ्ना पितृ–सम्पत्ति बेचेर वा ऋण लिएर जोखिम उठाइ लगानी गर्छन् । कहिलेकाहीँ लाग्छ — यस्तो जोखिम लिनु ठिक थियो कि थिएन ? तर फेरि सोचिन्छ — यदि हाम्रै ठाउँका मानिसहरूले जोखिम उठाएर लगानी गरेनन् भने कसले गर्ने ? अहिले भवन जलेको पीडा त छँदैछ, तर त्यसभन्दा ठूलो डर उद्यम गर्ने सोचमै आगो लगाइएको हो कि भन्ने हो । के हामी विदेशी लगानीकर्ता भित्र्याउने नाममा स्वदेशी लगानीकर्तालाई नै निरुत्साहित त गरिरहेका छैनौँ ? यो कुरा सबैले गम्भीरतापूर्वक बुझ्न आवश्यक छ । चीन र अमेरिका जस्ता देशमा अध्ययन गर्दा हामीले सिकेका थियौँ — विकासको मूल बाटो उत्पादनशीलता बढाउनु हो र रोजगारी सिर्जना गर्नु हो । कुनै पनि देश उत्पादन र रोजगारीका संयन्त्र बलियो नबनाई विकासको कल्पना गर्न सक्दैन । तर जब हामी उत्पादन र रोजगारी दिने संयन्त्रलाई नै तहस–नहस गर्छौं, के हामीले आफ्नै भविष्यको मुना नष्ट गरिरहेका छैनौँ ? अराजकता भनेको अराजकतै हो, अन्याय भनेको अन्यायै हो । नयाँको वकालत गर्ने आन्दोलन अन्यायको जगमा उभिएर कसरी स्थापित हुन सक्छ ? यस्ता अराजक गतिविधि गर्ने दोषीले सजाय पाए मात्र ‘नयाँ’को स्थापना सम्भव छ भन्ने मेरो धारणा हो । हाम्रो व्यवसाय सन् १९६० को दशकमा सुरु भएको हो — जब विदेशी पर्यटकहरू हाम्रा जमिनमा क्याम्पिङ गर्थे । ४४ वर्षअघि हामीले होटल सरोवर स्थापना गरेका थियौँ र सन् २०१८ को अन्त्यमा फेरि ठूलो जोखिम उठाएर नयाँ होटल निर्माण गरेका थियौँ । त्यतिबेला पनि हामीले आफ्नै जग्गा बेचेर व्यवसाय सुरु गरेका थियौँ, अहिले पनि त्यस्तै जोखिम उठाएर बैंकबाट ठूलो ऋण लिएर लगानी गरेका थियौँ । हाम्रो यात्रा सजिलो थिएन, तर यही चुनौतीहरूले हामीलाई अझ दृढ र सबल बनाएका छन् । कोभिड, खराब सडक संरचना, र विमान दुर्घटनाजस्ता कठिन क्षणहरूले हाम्रो आत्मबललाई अझ प्रबल बनाएको थियो । तर फेरि भदौ २४ को घटनाले गहिरो चोट त दियो, तर हाम्रो सपना, परिश्रम र समाजमा उद्योगबाट केही योगदान गर्ने संकल्प अडिग छौं । ‘हामी विचलित भइरहेको बेला विचलित भएका पनि छैनौं ।’ हामीले सधैं संकटलाई अवसरमा रूपान्तरण गरेका छौं र यस संकटलाई पनि नयाँ सम्भावनाको ढोका बनाउने आत्मबल राख्छौं । सबैभन्दा महत्वपूर्ण कुरा — हाम्रा पाहुना, कर्मचारी र परिवार सबै सुरक्षित हुनुहुन्छ, यही हाम्रो सबैभन्दा ठूलो धरोहर हो । हाम्रा कर्मचारी, अतिथि र शुभचिन्तकहरूको निरन्तर सहयोग र माया नै हाम्रो सबैभन्दा ठूलो शक्ति हो । यही हौसला र एकताले हामीलाई पुनः उठ्न, होटललाई पुनर्जीवित बनाउन र अझ सशक्त रूपमा अघि बढ्न ऊर्जा दिएको छ । हामीलाई पीडा छ, दुःख छ, तर हामी छिट्टै पुनः सञ्चालनमा फर्कनेछौं र अझ सशक्त भएर अघि बढ्नेछौं । पोखरा चेम्बर अफ कमर्स एन्ड इन्डस्ट्रीको साथ र समर्थन सधैं रहँदै आएको छ । सामाजिक संस्थाहरूको सामूहिक ज्ञान, सञ्जाल, पैरवी र सहयोगले यो कठिन समयलाई शक्तिमा रूपान्तरण गर्न मद्दत गर्नेछ । हामी सबै मिलेर न्यायपूर्ण, सुरक्षित र समुन्नत समाज निर्माणमा अग्रसर हुनेछौं ।