काठमाडौं । टी–२० विश्वकप एसिया–प्यासिफिक क्षेत्रीय फाइनलको पहिलो खेलमा नेपालले उत्कृष्ट प्रदर्शन गर्दै कुवेतलाई ५८ रनले पराजित गरेको छ। यस विजयसहित नेपालले सुपर–६ चरणमा पुग्ने सम्भावना बलियो बनाएको छ।

बुधबार ओमानको अल अमेरत मैदानमा टस हारेर पहिले ब्याटिङ गरेको नेपालले २० ओभरमा ७ विकेट गुमाउँदै १४१ रनको चुनौतीपूर्ण योगफल बनाएको थियो। ओपनर कुशल भुर्तेलले ५६ बलमा ६ चौका र २ छक्कासहित ६६ रनको धमाकेदार पारी खेले भने गुल्सन झाले अन्तिम समयमा ६ बलमा २० रन जोड्दै टोलीको रन गति तीव्र पारे। दीपेन्द्रसिंह ऐरीले २० रन र कप्तान रोहित पौडेलले १६ रनको योगदान दिए।

लक्ष्य पछ्याउन मैदानमा उत्रिएको कुवेत नेपालका बलरहरूको धारिलो बलिङ अगाडि १८.१ ओभरमै ८३ रनमा अलआउट भयो। सन्दीप लामिछाने, ललितनारायण राजवंशी र कप्तान रोहित पौडेलले समान दुई–दुई विकेट लिँदा कुशल भुर्तेल, सोमपाल कामी र नन्दन यादवले एक–एक विकेट हात पारे।

कुवेतका बलर अनुदीप चन्दमार र नविनराज राजेन्द्रनले दुई–दुई विकेट लिए।

अब नेपालले शुक्रबार जापानविरुद्ध दोस्रो खेल खेल्नेछ। नौ टिम सहभागी यस प्रतियोगिताबाट सुपर–६ हुँदै शीर्ष तीन टोलीले भारत र श्रीलंकामा हुने सन् २०२६ को टी–२० विश्वकपमा स्थान पाउनेछन्।