पोखरा ।
पोखरा अन्तर्राष्ट्रिय म्याराथनको आयोजक संस्था नेपाल भूतपूर्व खेलाडी मञ्चको आयोजनामा पोखरामा मासिक दौड प्रतियोगिता भएको छ । शनिबार भएको विद्यालय स्तरीय १६ वर्ष मुनिको ५ किमी छात्रछात्रा मासिक दौड प्रतियोगितामा छात्रतर्फ ईश्वर पुर्जाले उपाधि जित्न सफल भए भने छात्रातर्फ एन्जिला जिटिले उपाधि हात परिन् ।

पुर्जाले निर्धारित दूरी १६ मिनेट ३६ सेकेन्डमा पूरा गरे भने जिटीले २१ मिनेट १२ः०१ सेकेन्डमा दूरी पार गरे । छात्रतर्फ वसन्त रानामगर दोस्रो हुँदै निर्धारित दूरी १७ मिनेट ०५ सेकेन्डमा पार गरे । तेस्रो भएका रबिन तामाङले निर्धारित मार्ग १७ मिनेट ०६ सेकेन्डमा पार गरे । छात्रातर्फ दोस्रो हुन सफल ममता नेपालीले निर्धारित दूरी २४ मिनेट २२ः०३ सेकेन्डमा पार गरिन् भने तेस्रो हुन सफल शिवानी हमालले निर्धारित दूरी पूरा गर्न २५ मिनेट ३६ः०४ सेकेन्ड लगाइन् ।

पोखरा रंगशालाको फुटबल मैदानबाट सुरु भएको दौड पोखराका बिभिन्न भाग परिक्रमापछि सोही स्थानमा आएर समाप्त भएको थियो । दौडमा बिभिन्न विद्यालयका विद्यार्थीको उल्लेख्य सहभागिता थियो । कार्यक्रममा हालसम्म दौडमा पाँच पटक सहभागिता जनाउने सञ्जल रोका, रश्मि परियार, प्रत्युस बस्नेत, आयुस सुनार, वसन्त नेपाली र बिबिश घर्ती पुनलाई सम्मानपत्रले सम्मान गरियो ।

पोखरा उद्योग बाणिज्य संघका अध्यक्ष गोकण कार्कीले दौड सुरुआत गरेका थिए । नेपाल भूतपूर्व खेलाडी मञ्चका अध्यक्ष दिल बहादुर गुरूङको अध्यक्षतामा भएको कार्यक्रममा विजेता खेलाडी संस्थापक अध्यक्ष खड्क रानाभाट, मासिक दौडका संयोजक तेजबहादुर गुरूङ, मञ्चका निवर्तमान अध्यक्ष हरिप्रसाद पराजुली, सचिव महेश पौडेल लगायतले मेडल, प्रमाणपत्र र गिफ्ट ह्याम्पर प्रदान गरेका छन् ।