पोखरा ।

ओमानमा जारी आईसीसी टी–२० विश्वकप एसिया–इस्ट एसिया प्यासिफिक छनोटको सुपर सिक्सअन्तर्गत सोमबार नेपालले कतारमाथि रोमाञ्चक जित दर्ता गरेको छ।

नेपालले दिएको १४८ रनको लक्ष्य पछ्याउने क्रममा कतार १९ ओभर ५ बलमै १४२ रनमा समेटिँदा नेपाल ५ रनले विजयी भएको हो। खेलमा नेपाली बलरहरूले उत्कृष्ट प्रदर्शन गरे भने स्पिनर सन्दीप लामिछानेले जितमा निर्णायक भूमिका खेले।

सन्दीपले ३.५ ओभरमा १८ रन खर्चेर ५ विकेट लिए र विपक्षीका ब्याटरहरूलाई असहज बनाएका थिए। यही प्रदर्शनमार्फत उनले अन्तर्राष्ट्रिय क्रिकेटमा आफ्नो २५०औं विकेट पूरा गरेका छन्। उनले कतारका ओपनर लियानागेलाई बोल्ड गर्दै यो उपलब्धि हासिल गरेका हुन्।

यसैबीच, सोमबारको खेल नेपाली क्रिकेटका लागि अर्को ऐतिहासिक दिन पनि बनेको छ। कप्तान रोहितकुमार पौडेलको नेतृत्वमा राष्ट्रिय टोलीले आफ्नो १००औं अन्तर्राष्ट्रिय खेल खेलेको छ।

२०७९ कात्तिक २५ मा पहिलो पटक कप्तान बनेका रोहितको नेतृत्वमा नेपालले टी–२० आईमा ३० जित, १८ हार र ३ बराबरी खेलेको छ। एकदिवसीय क्रिकेटमा नेपालले २५ जित र २० हारको रेकर्ड बनाएको छ।

रोहितको स्थिर नेतृत्व, टोलीबीचको एकता र सन्दीपको धारिलो बलिङका कारण नेपाल अहिले विश्वकपको ढोका नजिक पुगेको विश्वास बलियो बन्दै गएको छ।