पोखरा ।
आन्तरिक राजस्व विभागको तथ्यांकअनुसार गत आर्थिक वर्ष २०८१/८२ सम्ममा करिब ३.३ लाख करदाताबाट २ खर्ब ७५ अर्ब रुपैयाँ कर असुली हुन बाँकी रहेको छ । यसमध्ये ९४ अर्ब ९५ करोड रुपैयाँ सामान्य बक्यौता र १ खर्ब ८० अर्ब १० करोड रुपैयाँ प्रशासकीय पुनरावलोकनमा रहेका करदाताबाट असुल गर्न बाँकी छ ।

बक्यौतामध्ये सबैभन्दा धेरै आयकरतर्फ २ खर्ब १९ अर्ब ११ करोड रुपैयाँ, मूल्य अभिवृद्धि करतर्फ ४८ अर्ब ७० करोड रुपैयाँ, अन्तःशुल्कतर्फ ४ अर्ब ९ करोड रुपैयाँ र अन्यतर्फ ३ अर्ब १५ करोड रुपैयाँ रहेको छ ।

गत आर्थिक वर्षमा विभागले बक्यौता असुलीमा खासै प्रगति गर्न सकेन । आयकरतर्फ २२ अर्ब ७६ करोड रुपैयाँ असुली गर्ने लक्ष्य राखिएकोमा जम्मा ८ अर्ब ७१ करोड रुपैयाँ मात्र असुल भयो, जुन लक्ष्यको ३८.२९ प्रतिशत मात्र हो । मूल्य अभिवृद्धि करतर्फ १६ अर्ब ३३ करोड रुपैयाँको लक्ष्यमा १० अर्ब ३३ करोड रुपैयाँ (६३.२८ प्रतिशत) असुल भयो ।

तर, बक्यौता समायोजनमा भने विभागले राम्रो प्रगति गरेको छ । आयकरतर्फ २७ अर्ब ३८ करोड रुपैयाँको लक्ष्यमा २१ अर्ब ३९ करोड रुपैयाँ (७८.१ प्रतिशत) समायोजन भयो । मूल्य अभिवृद्धि करतर्फ १८ अर्ब १७ करोड रुपैयाँको लक्ष्यमा २२ अर्ब २९ करोड रुपैयाँ (१२२.६३ प्रतिशत) समायोजन भएको छ।

यसले गर्दा सरकारलाई ठूलो राजस्व घाटा भइरहेको छ, जसले विकास निर्माण र अन्य सार्वजनिक खर्चमा असर पारेको छ ।