पोखरा ।
‘हामीलाई किन लिएर आएको ? माथिको आदेश
राख्नु राख्नुहुन्छ ? हजुर आदेश पर्खनुपर्छ
अनि कहिले छोड्नुहुन्छ ? त्यो पनि माथि कै भर पर्नुपर्छ
सबै माथिले गर्ने भए तपाईंहरुको काम के छ ?…’

राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले लेखेको कविता संग्रह ‘माथिको आदेश छ’ मा लेखिएका कविताले उनले जेल जीवन बिताउँदा पाएको सास्ती बोलेको छ । र्‍यान्डम रिडर्स सोसाइटीले बुधबार पोखरामा आयोजना गरेको ‘रविन्द्र मिश्र माथिको आदेश छ हिरासतमा कविता पोखरामा वाचन तथा अन्तरक्रिया’ कार्यक्रममा मिश्रले उक्त संग्रहमा रहेका कविता सुनाउँदै कुन्ठा पोखे ।

कात्तिक १५ गते सार्वजनिक गरिएको कविता संग्रहमा उनले जेल बस्दा लेखेका कविता संग्रहित गरेको बताए । गत चैत १५ गतेको राजावादी आन्दोलनपछि पक्राउ परेका मिश्रले ५० दिन हिरासत बस्दा लेखेका कविता पुस्तकमार्फत सार्वजनिक गरेको सुनाए । मिश्रले आफ्नो कविता संग्रह हिरासतसँगको बाध्यात्मक संसर्गबाट जन्मिएका सन्तान भएको बताए ।

‘५० दिन हिरासतमा बस्दा मलाई ३५ वटा कविता फुरेछन् । कविताको सोच दिमागमा आउनु सामान्य हो तर, त्यो सोच कविताको स्वरूपमा अभिव्यक्त हुनु असामान्य हो,’ उनले भने, ‘हिरासत बसाइँमा मलाई निरन्तर रूपमा कविताका सोचहरू दिमागमा फुरेछन् र तिनलाई मैले कवितामा रुपान्तरण गर्न सकेछु ।’ जेल जानु अघिका सृजनालाई जेलभित्र लेखिएका ३५ वटा कवितालाई मिलाएर कृति सार्वजनिक गर्ने सोंच बनाए पनि प्रकाशक र केही साहित्यकारको सल्लाहमा जेल भित्र लेखिएका कवितामात्र प्रकाशन गरिएको उनको भनाइ छ ।

आफ्ना कृतिमा विभिन्न प्रकारका कविता समावेश गरिएको उनले सुनाए । ‘पहिलो त राजनीतिका हुने नै भयो । दोस्रो हिरासतमा बस्दाका आशा र निराशाका कविता छन्,’ उनले भने, ‘तेस्रो आध्यात्मिक खालका छन् र चौथों अन्य विधामा आधारित खालका छन् ।’

मिश्रको यो दोस्रो कविता संग्रह हो । उनको पहिलो कविता संग्रह ‘रवीन्द्र मिश्रका कविता’ २०७१ सालमा प्रकाशन भएको थियो । मिश्रको कविता संग्रह फाइन प्रिन्टले प्रकाशन गरेको हो । समग्रमा उनको यो उनको छैटौँ कृति हो ।