पोखरा ।
उत्तरी गोरखाको विश्व प्रसिद्ध हिमाली गन्तव्य मनास्लु संरक्षण क्षेत्रले चालु आर्थिक वर्षको पहिलो चौमासिकमै प्रवेश शुल्कबाट २ करोड २७ लाख ९६ हजार ९ सय ७० रुपियाँ राजस्व उठाएको छ । मनास्लु क्षेत्र प्रवेश गर्ने विदेशी तथा आन्तरिक पर्यटक बढेपछि मनास्लु संरक्षण क्षेत्रमा आर्थिक आम्दानी उकालो लागेको हो ।

४ महिनाको अवधिमा मनास्लु क्षेत्र घुम्न आउने पर्यटक ८ हजार ८ सय २८ जनामध्ये नेपाली पर्यटक १ सय ४२ जनाबाट २ सयका दरले २ लाख ८४ हजार रुपियाँ जम्मा भएको छ । सार्क राष्ट्रका १ सय ७२ जनाबाट प्रतिव्यक्तिबाट १ हजारका दरले १ लाख ७२ हजार र विदेशी पर्यटक ८ हजार ५ सय ४ जनाबाट ३ हजारका दरले २ करोड २५ लाख ९६ हजार ५ सय ७० रुपियाँ प्रवेश शुल्कबाट उठाइएको एमक्याप गोरखा प्रमुख सन्तोष सेरचनले सुनाए ।

एमक्याप गोरखा प्रमुख शेरचनका अनुसार गत वर्षको तुलनमा यो चौमासिकमा पर्यटक आगमन ३० प्रतिशतले वृद्धि भएको छ । चुमनुब्री गाउँपालिका १ मा रहेको मनास्लु संरक्षण क्षेत्र कठोर भूस्वरूप, अदभूत प्राकृतिक सम्पदा, विविध सांस्कृतिक विरासत र विश्वकै मनमोहक पदमार्ग भएकाले पर्यटकको आकर्षण बढ्दा प्रवेश शुल्क बढ्न गएको हो ।

सरकारद्वारा घोषित संरक्षित क्षेत्रहरूमध्ये मनास्लु हिमाली क्षेत्र अहिले तीव्र रूपमा पहिचान बटुलिरहेको छ । हिमाल आरोहण र पदयात्रा दुबैका लागि सुरक्षित, साहसप्रद र प्राकृतिक सौन्दर्यले भरिपूर्ण गन्तव्यको रूपमा यसको प्रतिष्ठा अन्तर्राष्ट्रिय यात्रु समुदायमा उकालो लाग्दै गएको छ । वर्षौदेखि निरन्तर प्रवर्धन, यातायात तथा सञ्चार पूर्वाधार विस्तार र स्थानीय समुदायको आतिथ्य संस्कृतिले पनि पर्यटकमैत्री वातावरण निर्माणमा मद्दत पु¥याएको मनास्लु संरक्षण क्षेत्र आयोजना कार्यालय गोरखाले जनाएको छ ।

मनास्लु संरक्षण क्षेत्र आयोजनाले बढ्दो यात्रुको चापलाई व्यवस्थापन गरी पर्यावरणीय सन्तुलन जोगाउने कार्यलाई आगामी महिनाहरूमा अझ कडाइका साथ अघि बढाउने भएको छ । संरक्षण क्षेत्र भित्र अनियोजित संरचना विकास, फोहोर व्यवस्थापनको चुनौती र संवेदनशील इको सिस्टममा देखिएका जोखिमलाई न्यूनीकरण गर्न अबको केही समयमा अभियान सञ्चालन गरिने कार्यालयले स्पष्ट पारेको छ ।

२ करोड २७ लाख ९६ हजार ९ सय ७० रुपियाँ रकमले मनास्लु संरक्षण क्षेत्र नेपालको दिगो पर्यटन र वातावरण संरक्षण दुबै क्षेत्रमा बलियो सम्भावना बोकेको पुष्टि गरेको छ । प्राकृतिक सम्पदाको संरक्षणसहित स्थानीयको आर्थिक उन्नतिमा यस क्षेत्रले अदभुतपूर्व योगदान दिएको तथ्यले मनासलुलाई राष्ट्रिय तथा अन्तर्राष्ट्रिय स्तरको आकर्षण गन्तव्यको रूपमा झनै सुदृढ पारेको छ ।

मनास्लु संरक्षण क्षेत्र अन्तर्गतको सामुदायिक सहभागिता, पर्यावरणीय निगरानी र दिगो पर्यटन प्रवर्धन जस्ता कार्यक्रमलाई सुदृढ बनाउन प्रवेश शुल्कबाट उठेको रकम मुख्य स्रोतको रूपमा प्रयोग हुँदै आएको छ । स्थानीय बस्तीमा भूकम्पपछिको पुनःस्थापना, पदमार्ग मर्मत, स्वच्छता व्यवस्थापन, जौविक विविधता संरक्षण तथा जोखिम न्यूनीकरण क्षेत्रमा पनि यस प्रवेश शुल्क बापतको रकमले महत्वपूर्ण योगदान पुर्‍याएको मनास्लु संरक्षण क्षेत्र आयोजना कार्यालय गोरखाले जनाएको छ ।