स्याङ्जा । स्याङ्जाको बिरुवा गाउँपालिकाले आयोजना गरेको सातौं अन्तर विद्यालय राष्ट्रपति रनिङ शिल्ड प्रतियोगिताको उपाधि भुरुङचौकी माध्यमिक विद्यालयले जितेको छ ।

बिरुवा–८ मेथाभुरुङस्थित पुष्प मदन खेलमैदानमा सम्पन्न प्रतियोगितामा भुरुङचौकीले १० स्वर्ण, ९ रजत र २ कांस्य पदक हात पार्दै उपाधि उचालेको हो ।

प्रतियोगितामा जामुने डाँडा माध्यमिक विद्यालयले ६ स्वर्ण, ५ रजत र २ कांस्य पदकसहित दोस्रो स्थान हासिल गरेको छ । यस्तै, ५ स्वर्ण, ४ रजत र ४ कांस्य पदक जितेको बिरुवा मुनलाइट एकेडेमी तेस्रो भएको छ ।

गाउँपालिका अध्यक्ष सूर्यबहादुर कुँवरले खेलकुदले विद्यार्थीको आत्मविश्वास, नेतृत्व क्षमता र अनुशासन विकासमा मद्दत गर्ने बताए । उनले भने, ‘प्रतियोगिताले विद्यार्थीको शारीरिक तथा मानसिक विकासमा पनि महत्त्वपूर्ण योगदान पुर्‍याउँछ ।’

प्रतियोगितामा भलिबल, कबड्डी, दौड, हाइजम्प, लङजम्प, ज्याभलिन थ्रो र सटपुटजस्ता खेल समावेश गरिएको थियो । यसपटकको रनिङ शिल्डमा पालिकाभित्रका १० विद्यालयले सहभागिता जनाएका थिए ।