पोखरा । कास्की बचत तथा ऋण सहकारी संघ लिमिटेडले आफ्नो २५औं स्थापना दिवस रक्तदान कार्यक्रम आयोजना गरी मनाएको छ । सामाजिक उत्तरदायित्व अन्तर्गत आइतबार पोखरामा गरिएको खुल्ला रक्तदानमा ३६ युनिट रगत संकलन भएको छ ।

कार्यक्रममा गण्डकी प्रदेश सहकारी रजिष्ट्रार कार्यालयका रजिष्ट्रार भेषराज रिजालले सहकारीले सामाजिक उत्तरदायित्वका कार्यक्रममार्फत समुदायलाई लाभान्वित बनाउनुपर्ने बताए । सहकारी भनेको केवल निक्षेप संकलन र ऋण प्रवाह गर्ने निकाय मात्र हो भन्ने बुझाइ चिर्न आवश्यक रहेको उनको भनाइ थियो ।

‘केही सहकारी संस्थाहरू सदस्यमुखी नभई सञ्चालकको स्वार्थमा चल्दा समग्र सहकारी क्षेत्रको छवि धुमिल भएको छ,’ रजिष्ट्रार रिजालले भने, ‘अब सरकार, नियमनकारी निकाय र सहकारी संघहरू मिलेर यस क्षेत्रलाई व्यवस्थित र सुदृढ बनाउनुको विकल्प छैन ।’

नेफ्स्कुनका सञ्चालक कमला गिरीले सहकारी नियमन प्राधिकरण र कर्जा सूचना केन्द्रमा दर्ता प्रक्रिया अघि बढ्नु स्वागतयोग्य रहेको बताइन् । केही संस्थाको गलत क्रियाकलापले असल अभ्यास गरिरहेका सहकारीलाई पनि एउटै डालोमा राख्ने काम भएको भन्दै उनले चिन्ता व्यक्त गरिन् । गिरीले भनिन्, ‘नियमनमार्फत दायरा फराकिलो बनाएर सहकारीलाई समृद्धिसँग जोड्नुपर्छ ।’

कार्यक्रममा जिल्ला सहकारी संघका निवर्तमान अध्यक्ष सावित्री कोइराला, हितैषी सहकारीका अध्यक्ष मदनप्रसाद आचार्य, शिवालय टोल विकास संस्थाका अध्यक्ष मिना ढकाल र शिवालय आमा समूहका अध्यक्ष कल्पना सिग्देलले शुभकामना मन्तव्य राखेका थिए ।

संघका अध्यक्ष शेरबहादुर कार्कीको अध्यक्षतामा सम्पन्न कार्यक्रममा उपाध्यक्ष एवं संयोजक ईश्वरप्रसाद सुवेदीले स्वागत र सचिव मिनराज तिमिल्सिनाले सञ्चालन गरेका थिए । संघमा कास्की जिल्लाका ३ सय ३ वटा बचत तथा ऋण सहकारी संस्था आबद्ध छन् ।