पोखरा ।
पोखरा कलेज अफ म्यानेज्मेन्टको आयोजना तथा युनिभर्सिटी ग्रान्ट कमिसनको सहयोगमा एन्टरप्रोनियरसिप सपोर्ट प्रोग्राम अन्तर्गत ‘स्मार्ट एग्रोप्नरसिप एजुकेसन एन्ड ट्रेनिङ’ पोखरामा भएको छ ।

५ दिनसम्म चलेको ४० घन्टे कार्यक्रममा व्यावसायिक कृषिकाबारे तालिमसँगै सैद्धान्तिक पक्षबारे चर्चा भएको थियो । सोमबारको कार्यक्रममा सहभागी ३० विद्यार्थीले आ–आफ्ना कृषिका व्यावसायिक योजना प्रस्तुत गरे । तालिममा बिबिए, बिसिआइएसमा सातौं र आठौं सेमेष्टर पढ्दै गरेका तथा पछिल्लो पाँच वर्ष पास आउट विद्यार्थी सहभागी थिए ।

तीमध्येबाट छानिएका ५ सहभागीले जनही नगद १० हजार रुपैयाँ पुरस्कार प्राप्त गरे । पुरस्कृत हुनेमा अञ्जली पौडेल, प्रवास आचार्य, निशान क्षेत्री, दीपिका रिमाल र कृतिका पराजुली छन् । कलेजका बिसिएस आइटी संयोजक हरि बरालले उनीहरुलाई शुभकामना दिए । कलेजका अध्यक्ष विनोद कायस्थले तालिमका सहभागी विद्यार्थीहरुलाई प्रमाण–पत्र प्रदान गरे ।

तालिममा उत्कृष्ट बनेका ५ विद्यार्थी काठमाण्डौमा हुने अन्तिम प्रतियोगिताका लागि समेत छानिएका छन् । काठमाडौंमा उत्कृष्टता हाँसिल गर्ने विद्यार्थीले बढीमा १ करोडसम्मको प्रस्तावमा ४० प्रतिशतसम्म विना ब्याज ऋण प्राप्त गर्ने छन् ।

अन्तिम दिन निर्णायक मण्डलमा रहेका पोखरा महानगरपालिका व्यवसाय प्रवद्र्धन केन्द्रका प्रमुख नवराज अधिकारी, उद्यमी एवं अनुसन्धानकर्ता रवि भण्डारी र हरिलो एग्रो इन्डष्ट्रीज प्रालिका सहसंस्थापक प्रकाश आचार्य रहनुभएको थियो । रिसर्च मेनेज्मेन्ट कमिटी संयोजक डा अर्जुन सिग्देलले पनि कार्यक्रममा बोलेका थिए ।