काठमाडौं । निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै ‘निर्वाचन आचारसंहिता–२०८२’ को मस्यौदा सार्वजनिक गरेको छ । आयोगले सरोकारवालासँग राय, सल्लाह र सुझाव लिनका लागि मस्यौदा जारी गरेको हो ।

निर्वाचनलाई स्वतन्त्र, स्वच्छ, निष्पक्ष, पारदर्शी तथा भयमुक्त वातावरणमा सम्पन्न गर्ने उद्देश्यले आचारसंहिताको मस्यौदा तयार पारिएको आयोगले जनाएको छ । निर्वाचन आयोग ऐन, २०७३ को दफा २२ ले दिएको अधिकार प्रयोग गरी आयोगले यो कदम चालेको हो ।

प्रस्तावित आचारसंहितामा १० वटा परिच्छेद र ५ वटा अनुसूची रहेका छन् । यो नयाँ आचारसंहिता लागू भएसँगै यसअघिको ‘निर्वाचन आचारसंहिता–२०७९’ खारेज हुनेछ ।

आयोगले यसपटक आचारसंहितामा केही कडा र नवीन व्यवस्था प्रस्ताव गरेको छ । मस्यौदामा आचारसंहिता उल्लङ्घन गर्ने व्यक्ति वा संस्थाको नाम सार्वजनिक गरिने उल्लेख छ । यस्तै, राजनीतिक दलहरूले निर्वाचन घोषणापत्र अनिवार्य रूपमा सार्वजनिक गर्नुपर्ने व्यवस्था पनि गरिएको छ । प्रचारप्रसारमा विद्युतीय माध्यम र सूचना प्रविधिको उपयोगलाई पनि आचारसंहिताले समेटेको छ ।रासस