पोखरा
महिला अधिकारका क्षेत्रमा अन्तर्राष्ट्रिय पहिचान बनाएकी अधिकारकर्मी तथा संयुक्त राष्ट्रसंघीय निकाय की पूर्व क्षेत्रीय निर्देशक चाँदनी जोशीको नयाँ पुस्तक ‘विभिङ माइ साउथ एशियन टेपेस्ट्री’ शनिबार पोखरामा सार्वजनिक भएको छ ।

जोशी दक्षिण एसियामा महिला सशक्तीकरण र लैंगिक समानताका लागि लामो समयदेखि सक्रिय छिन् । उनले राष्ट्रसंघमा रहेर यस क्षेत्रका महिलाहरूको सामाजिक र आर्थिक अवस्था सुधार्न महत्वपूर्ण भूमिका निर्वाह गरिन् । उनको यो नयाँ कृतिले दक्षिण एसियाको सामाजिक बनोट, महिलाका संघर्ष र उनको आफ्नै लामो कार्यअनुभवलाई कलात्मक रूपमा समेटेको छ । पुस्तकको शीर्षकमा प्रयोग गरिएको ‘टेपेस्ट्री’ शब्दले दक्षिण एसियाको विविधता र यहाँका कथाहरूलाई एउटा सुन्दर बुट्टाजस्तै उनिएको संकेत गर्छ ।

लेखिका जोशीले पोखरा आफ्नो जीवनको एक विशेष स्थान रहेको बताइन् । उनले यो पुस्तक केवल आफ्नो आत्मकथा मात्र नभएर नेपालका ६५ जिल्लाका विभिन्न कुनाकाप्चा, ४५ देश र लाहोरका गल्लीदेखि बम्बईका बस्तीसम्म पुगेर भोगेका र देखेका आम महिलाका कथाहरूको सँगालो भएको उल्लेख गरिन् । उनले भनिन्, ‘यो कयौँ महिलाहरूको मर्म, साहस र उनीहरूको गौरवगाथा हो । मैले यसमा संघर्षशील महिलाहरूलाई ‘सिरो’ (नायक) को रूपमा प्रस्तुत गरेकी छु ।’ उनले पितृसत्ता पुरुषमा मात्र नभई महिलामा पनि हुन सक्ने र आफ्नो पुस्तकले यस्ता परम्परागत सोचमाथि प्रश्न उठाएको जानकारी दिइन् ।

समारोहमा रामकली खड्काले स्वागत मन्तव्य राखिन् भने सृष्टि जोशी मल्लले लेखिकाको परिचय र व्यक्तित्वमाथि प्रकाश पारिन् । कार्यक्रममा कास्कीका प्रमुख जिल्ला अधिकारी रुद्रादेवी शर्मा, डा चन्द्रा भद्रा, महिला विकास अधिकृत पूर्ण श्रेष्ठ र शिक्षासेवी विकल शेरचनले पुस्तकले समेटेका विषय र यसको महत्वका बारेमा आफ्ना धारणा राखे ।

सो अवसरमा आरभ जोशीले कविता वाचन गरेका थिए भने चाँदनी जोशीको जीवन र कार्यमा आधारित एउटा छोटो भिडियो पनि प्रदर्शन गरियो । विकल शेरचनले धन्यवाद ज्ञापन गरेको उक्त कार्यक्रमको सहजीकरण सृष्टि जोशी मल्लले गरेकी थिइन् । यो पुस्तकले दक्षिण एसियाको सामाजिक र राजनीतिक इतिहासलाई नजिकबाट बुझ्न चाहने पाठकहरूका लागि एक महत्वपूर्ण दस्तावेजको काम गर्ने विश्वास गरिएको छ ।