पोखरा । पोखरा उद्योग वाणिज्य संघले आन्तरिक राजस्व कार्यालय पोखरालाई कम्प्युटर र ल्यापटप सहयोग गरेको छ। गत २४ भदौमा भएको ‘जेन–जी’ आन्दोलनका क्रममा कार्यालयमा आगजनी र तोडफोड भएपछि सेवा प्रवाह सहज बनाउन संघले आइतबार ५ लाख ३१ हजार ८७१ रुपैयाँबराबरका सामग्री हस्तान्तरण गरेको हो।

संघले कार्यालयलाई ५ सेट कम्प्युटर, २ वटा प्रिन्टर र एउटा ल्यापटप उपलब्ध गराएको छ। संघका अध्यक्ष गोकर्ण कार्कीले आन्तरिक राजस्व कार्यालय पोखराका प्रमुख कर अधिकृत शिवप्रसाद ढुंगानालाई ती सामग्री हस्तान्तरण गरे। अध्यक्ष कार्कीले सामग्री सहयोगपछि कार्यालयबाट प्रवाह हुने सेवामा सहजता आउने विश्वास व्यक्त गरे। आन्दोलनको दोस्रो दिन कार्यालयमा आगजनी, तोडफोड र लुटपाट हुँदा दैनिक कामकाजका लागि अत्यावश्यक सामग्रीको अभाव खड्किएको थियो।

उद्योगी तथा व्यवसायीसँग प्रत्यक्ष सरोकार राख्ने राजस्व कार्यालयको सेवा प्रवाहमा कुनै कमी नहोस् भन्ने उद्देश्यले सामग्री सहयोग गरिएको संघकी महासचिव शोभा गौतमले बताइन्। सामग्री हस्तान्तरण कार्यक्रममा संघका उद्योगतर्फका उपाध्यक्ष दिनेशचन्द्र बास्तोला, वाणिज्यतर्फका उपाध्यक्ष बलराम आचार्य, उपमहासचिव सुदीप प्रधानाङ्ग, कार्यसमिति सदस्यहरू जीवन श्रेष्ठ, दूधमान गुरुङ ‘आशिष’ र संघका सहायक निर्देशक सुनिल क्षेत्रीको उपस्थिति थियो