पोखरा । जेन्जी आन्दोलनपछि गण्डकी प्रदेश सभाको सामाजिक विकास तथा कृषि समितिको बैठक पहिलोपटक बस्ने भएको छ । आन्दोलनका क्रममा प्रदेश सभा सचिवालय र सभाहल जलेर ध्वस्त भएपछि समितिका बैठकहरू बस्न सकेका थिएनन् ।

अहिले रामघाटमा सचिवालय सञ्चालन आएसँगै ‘गण्डकी प्रदेशमा जनस्वास्थ्य सेवा सम्बन्धमा व्यवस्था गर्न बनेको विधेयक’ उपर दफावार छलफल गर्न समितिको बैठक बोलाइएको हो ।

प्रदेश सभा सचिवालयका अनुसार समितिको बैठक पोखराको रामघाटस्थित सचिवालयको बैठक कक्षमा पुस २१, २२ र २३ गते बस्नेछ ।

पुस २१ गते बिहान ११ बजे बस्ने बैठकमा जनस्वास्थ्यसँग सम्बन्धित विधेयकको अध्ययन तथा समीक्षा गर्ने कार्यसूची रहेको छ । त्यसैगरी पुस २२ गते विधेयकको सैद्धान्तिक छलफलमा उठेका विषयमा छलफल र समीक्षा गरिने सचिवालयले जनाएको छ ।

बैठकको अन्तिम दिन पुस २३ गते विधेयक उत्पन्न भएको मन्त्रालयका पदाधिकारीहरूसँग छलफल तथा अन्तक्र्रिया गर्ने कार्यक्रम तय गरिएको छ । सचिवालयले समितिका सदस्यहरूलाई तोकिएको समयमा उपस्थित हुन अनुरोध गरेको छ ।

जेन्जी आन्दोलनपछि प्रदेश सभाका गतिविधिहरू सुस्त रहेको र भौतिक संरचनाको अभाव झेलिरहेको अवस्थामा यस बैठकले विधेयक निर्माण प्रक्रियालाई पुनः गति दिने अपेक्षा गरिएको छ ।

सचिवालयले आफ्ना नियमित कामहरूलाई क्रमशः व्यवस्थित बनाउँदै लगेको प्रदेश सभा सचिव गोविन्द पौडेलले जानकारी दिए । समितिहरुका कार्यालयका लागि ठाउँ नभए पनि आलोपालो गरी बैठक बस्न मिल्ने गरी हलको व्यवस्थापन गरिएको पौडेलले बताए ।