पोखरा । नेपाली कांग्रेसका महामन्त्री विश्वप्रकाश शर्माले आगामी पुस २७ र २८ गतेका लागि तय गरिएको विशेष महाधिवेशनले पार्टी विभाजन नहुने दाबी गरेका छन् । काठमाडौँमा हुने यस अधिवेशनबाट पार्टी फुट्ने स्थिति आएमा सबैभन्दा पहिले आफू कार्यक्रम स्थलबाट बाहिरिने उनले स्पष्ट पारेका छन् । विशेष महाधिवेशनलाई लिएर पार्टीभित्र विवाद चर्किएका बेला महामन्त्री शर्माले सामाजिक संजाल फेसबुक मार्फत आफ्नो धारणा सार्वजनिक गर्दै यस्तो बताएका हुन् ।

विशेष महाधिवेशनबारे उठेका विभिन्न प्रश्नहरूको जवाफ दिँदै उनले पार्टी विभाजनको आशंकालाई पूर्ण रूपमा अस्वीकार गरेका छन् । ‘विशेष महाधिवेशन हुन्छ, पार्टी विभाजित हुँदैन,’ उनले लेखेका छन्, ‘यदि त्यस्तो हुन लागे अधिवेशनको हलबाट सबैभन्दा पहिला म बाहिर निस्कनेछु ।’ काठमाडौँमा हुने दोस्रो विशेष महाधिवेशनका लागि यसअघि नै पत्रकार सम्मेलन मार्फत आह्वान भइसकेको छ, जसमा शर्मा र अर्का महामन्त्री गगन थापाले सहभागी हुने घोषणा गरिसकेका छन् ।

पार्टीभित्र सभापति शेरबहादुर देउवा पक्ष विशेष महाधिवेशनको विपक्षमा देखिए पनि महामन्त्रीद्वय थापा र शर्मा पक्षले भने जेन्जी आन्दोलन पछिको परिस्थितिमा यो अनिवार्य भएको अडान राखेका छन् । बदलिएको राष्ट्रिय परिस्थिति, नयाँ चुनौती र पार्टीको दायित्व पुरा गर्न विशेष महाधिवेशन आवश्यक रहेको शर्माको तर्क छ । ‘आजको नेपाल भदौ २३ अगाडिको नेपाल होइन,’ भन्दै उनले नयाँ दृष्टि, योजना र संकल्पका लागि महाधिवेशनको विकल्प नभएको बताएका छन् ।

विशेष महाधिवेशनका लागि कांग्रेसका ४० प्रतिशत भन्दा बढी महाधिवेशन प्रतिनिधिहरूले हस्ताक्षर गरिसकेकाले यो विधान सम्मत भएको उनले उल्लेख गरेका छन् । कांग्रेस विधानको धारा १७(२) अनुसार ४० प्रतिशत प्रतिनिधिले लिखित माग गरेमा ३ महिनाभित्र विशेष महाधिवेशन बोलाउनुपर्ने बाध्यकारी व्यवस्था रहेको उनले स्मरण गराएका छन् । हस्ताक्षर नगरेका प्रतिनिधिहरू समेत यस महाधिवेशनमा सहभागी हुन पाउने उनले स्पष्ट पारेका छन् ।

आगामी फागुन २१ गते हुने प्रतिनिधि सभा निर्वाचनमा यस महाधिवेशनले कुनै नकारात्मक असर नपार्ने बरु निर्वाचनको परिणाम झन् राम्रो आउने शर्माको विश्वास छ । ‘मुर्झाएर बसेको कांग्रेस भन्दा जुर्मुराएर मैदानमा उत्रिएको कांग्रेसले राम्रो परिणाम दिन्छ,’ उनले लेखेका छन् । विशेष महाधिवेशनलाई उनले बदलिएको समयको कांग्रेस र बदल्नुपर्ने देशका लागि गरिएको एक महत्वपूर्ण संकल्पका रूपमा अथ्र्याएका छन् ।