पोखरा । हङकङलाई कर्मथलो बनाउँदै आएका तेक्वान्दोका नवौं डान तुल्सीकुमार गुरुङले पल्सर स्पोट्र्स अवार्डवापत प्राप्त गरेको नगद पुरस्कार पोखराका २ फुटबल क्लबलाई प्रदान गरेका छन् । २२औं एनएसजेएफ पल्सर स्पोट्र्स अवार्ड–२०८१ मा ‘स्पेसियल अवार्ड’ बाट सम्मानित गुरुङले पुरस्कारबाट पाएको १ लाख रुपैयाँ सहारा क्लब र एलजी एसोसिएसनलाई दिएका हुन् ।

उनले बिहीबार पोखरामा आयोजित कार्यक्रमका बीच दुवै क्लबलाई ५०–५० हजार रुपैयाँ हस्तान्तरण गरे । गुरुङले सहारा क्लबका अध्यक्ष केशवबहादुर थापालाई आसन्न २५औं आहा रारा पोखरा गोल्डकप सञ्चालनार्थ ५० हजार रुपैयाँ प्रदान गरे । पहिलोपटक लिगमा प्रतिनिधित्व गर्न सफल एलजी एशोसिएसनका अध्यक्ष डम्बरजङ गुरुङलाई पनि ५० हजार रुपैयाँ हस्तान्तरण गरे ।

रकम हस्तान्तरण गर्दै स्पेसियल अवार्ड विजेता तथा समाजसेवी गुरुङले पोखराको फुटबल विकासमा दुवै क्लबको योगदान महत्त्वपूर्ण रहेकाले थप उत्साह जगाउन आफूले सो रकम उपलब्ध गराएको बताए ।

उनले भने, ‘तपाईं दुवै क्लब गण्डकीको शान हो । यहाँको फुटबल जोगाउन यहाँहरुले खेलेको भूमिका प्रशंसनीय छ ।’ गुरुङले दुवै क्लबलाई अन्तर्राष्ट्रिय स्तरमा नै परिचित हुने गरी फुटबलको क्षेत्रमा अघि बढ्न सुझावसमेत दिए । उनले थपे, ‘पोखरालाई फुटबलमार्फत विश्वमा चिनाउन भूमिका खेल्न म शुभकामना दिन चाहन्छु ।’

कार्यक्रममा सहयोग ग्रहण गर्दै सहारा क्लबका अध्यक्ष थापा र एलजीका अध्यक्ष गुरुङले आभार व्यक्त गरेका थिए । त्यस अवसरमा सहारा क्लबका सल्लाहकार सुनिल गुरुङ, पूर्वअध्यक्ष विक्रम थकाली, गण्डकी प्रदेश फुटबल संघका महासचिव विनोद गुरुङ, सहाराका वरिष्ठ उपाध्यक्ष पूर्णबहादुर गुरुङ, एलजी एसोसिएसनका प्रमुख प्रशिक्षक किरण श्रेष्ठलगायतको उपस्थिति थियो ।