पर्वत ।  गण्डकी प्रदेशका उच्च पदस्थ कर्मचारीलाई आर्टिफिसियल इन्टेलिजेन्स (एआई) सम्बन्धी तालिम दिइएको छ । गण्डकी प्रदेश प्रशिक्षण प्रतिष्ठानको आयोजनामा कर्मचारीहरूको क्षमता अभिवृद्धि गर्ने उद्देश्यले पर्वतको कुश्मामा दुईदिने तालिम सम्पन्न भएको हो ।

सार्वजनिक सेवा प्रवाहमा नवीन प्रविधिको प्रयोग बढाउने लक्ष्यसहित पुस २४ र २५ गते तालिम सञ्चालन गरिएको थियो । तालिममा गण्डकी प्रदेशका प्रमुख सचिव, सचिव, उपसचिव तथा शाखा अधिकृत गरी ३८ जनाको सहभागिता थियो । सहभागीमध्ये ३३ पुरुष र ५ महिला थिए ।

तालिममा त्रिभुवन विश्वविद्यालयका उपप्राध्यापक रोमकान्त पाण्डेले स्रोत व्यक्तिका रूपमा सहजीकरण गरेका थिए । उनले सार्वजनिक सेवामा एआईको प्रयोग, प्रम्प्ट इन्जिनियरिङ, विभिन्न एआई उपकरण र तिनको उपयोगिताबारे प्रशिक्षण दिएका थिए । साथै, एआईको नैतिक प्रयोगका विषयमा पनि विस्तृत छलफल र अभ्यास गराइएको थियो ।

सरकारी सेवामा एआईजस्तो नवीन प्रविधिको प्रयोगमार्फत सेवा प्रवाहलाई छरितो, पारदर्शी र प्रभावकारी बनाउन तालिमले सहयोग पुग्ने विश्वास प्रतिष्ठानले लिएको छ ।