पोखरा । पोखरा बहुमुखी क्याम्पस प्राध्यापक संघले क्याम्पसको हालै सम्पन्न आठौं अधिवेशनबाट निर्वाचित नयाँ सञ्चालन समितिका पदाधिकारीलाईं बधाइ ज्ञापन गर्दै शुभकामना दिएको छ । शुक्रबार क्याम्पसमा भएको कार्यक्रममा संघले नवनिर्वाचित सञ्चालक समितिलाइ बधाई ज्ञापन गरिएको हो ।

केही दिनअघि भएको क्याम्पसको ३९ औं साधरणसभा तथा आठौं अधिवेशनले शिक्षासेवी शंकर गुरुङको अध्यक्षतामा नयाँ कार्यसमिति चयन गरेको थियो । कार्यक्रममा शिक्षासेवी प्राडा दिलबहादुर क्षेत्रीले क्याम्पसले अडिग र निरन्तर रुपमा आफ्नो कार्यसम्पादन गरिरहेको जनाए ।

क्याम्पसका सल्लाहकार शंकर देवकोटाले क्याम्पसले पछिल्ला क्रममा प्राप्त गरेको क्युएए लगायत बिभिन्न उपलब्धिहरुको श्रेय पूर्व सञ्चालन समितिसहित सबै प्राध्यापक तथा कर्मचारीलाई दिँदै क्याम्पसका प्रगतिलाई संरक्षण गर्नुपर्ने अझै ठूलो जिम्मेवारी नयाँ सञ्चालन समितिलाई रहेको औंल्याए ।

पोखरा बहुमुखी क्याम्पस प्राध्यापक संघका सभापति भीमप्रसाद न्यौपानेको अध्यक्षतामा भएको कार्यक्रममा क्याम्पस प्रमुख शिशुकला पराजुली, क्याम्पस आन्तरिक गुणस्तर सर्कल आइक्युएसी प्रमुख महेन्द्रप्रसाद रिमाल, प्राध्यापक संघका सचिव अनुपमणि अधिकारी, लाइब्रेरियन लक्ष्मी बास्तोला लगायतले बोलेका थिए ।