पोखरा । पोखरामा सम्पन्न ‘मिस्टर एन्ड मिस विश्वकर्मा गण्डकी सिजन–३’ को उपाधि निश्चल सुनार र स्वेच्छा विकले जितेका छन् । बि ब्रोज इन्टरटेन्मेन्टको आयोजनामा भएको प्रतियोगितामा अन्य प्रतिस्पर्धीलाई पछि पार्दै उनीहरूले उपाधि हात पारेका हुन् ।

प्रतियोगितामा संगिता ल्वागुन फस्ट रनरअप र संगिता सुनार सेकेन्ड रनरअप घोषित भए । त्यस्तै, बिबिसा विश्वकर्माले ‘अर्गनाइजर च्वाइस अवार्ड’ प्राप्त गरिन् । विजेताहरूले उपाधिसँगै ‘मिस्टर एन्ड मिस विश्वकर्मा राष्ट्रिय प्रतियोगिता’ मा सिधै सहभागिता जनाउने अवसर, नगद पुरस्कार र आकर्षक उपहार प्राप्त गरेका छन् ।

कार्यक्रमका प्रमुख अतिथि पोखरा महानगरपालिकाका प्रमुख धनराज आचार्यले विश्वकर्मा समुदाय ऐतिहासिक रूपमा सीप, कला र श्रमसँग जोडिएको बताए । उनले यस्ता कार्यक्रमले समुदायको आत्मसम्मान र पहिचान मजबुत बनाउने धारणा राखे । विशेष अतिथि गायक प्रकाश सपुतले विश्वकर्मा समुदायको संघर्ष र प्रतिभाको प्रशंसा गर्दै विजेतालाई शुभकामना दिए ।

कार्यक्रमको विशेष आकर्षणका रूपमा विश्वकर्मा समुदायको मौलिक पोसाक सार्वजनिक गरिएको थियो । विश्वकर्मा समुदायको पहिचान, संस्कृति र प्रतिभा उजागर गर्ने उद्देश्यले कार्यक्रम आयोजना गरिएको आयोजकले जनाएको छ ।

प्रतियोगिताको निर्णायकमा डिजाइनर अमित बराल, सामाजिक अभियन्ता सारिका गुरुङ, ‘मिस्टर एन्ड मिस विश्वकर्मा नेसनल सिजन–४’ का विजेता शौरव विश्वकर्मा र डिजाइनर शुष्मा गुरुङ रहेका थिए । उनीहरूले सहभागीको व्यक्तित्व, प्रस्तुति, आत्मविश्वास र सामाजिक दृष्टिकोणका आधारमा मूल्यांकन गरेका थिए । कार्यक्रममा मञ्जु विक, बिपास सुनार र समिर रामदामले सांगीतिक प्रस्तुति दिएका थिए ।