पोखरा ।  नेपाल टेलिकम पोखराले आफ्नो २२औं वार्षिकोत्सवको अवसरमा सूचना प्रविधि र डिजिटल साक्षरतासम्बन्धी सचेतना अभियान सञ्चालन गर्ने भएको छ । वार्षिकोत्सवका अवसरमा टेलिकमले साताव्यापी व्यापार प्रवर्द्धन मेला, २२ दिनसम्म चल्ने उपहार योजना र विद्यालय केन्द्रित साक्षरता अभियान सार्वजनिक गरेको हो ।

कार्यालय प्रमुख प्रेमराज ढुंगानाका अनुसार अभियानअन्तर्गत पोखराका २२ वटा सरकारी विद्यालयमा ‘डिजिटल साक्षरता कक्षा’ सञ्चालन गरिनेछ । उक्त कक्षामा किशोरकिशोरीहरूलाई साइबर सुरक्षा, आर्टिफिसियल इन्टेलिजेन्स (एआई), इन्टरनेटको सही प्रयोग र अनलाइन दुर्व्यवहारबाट जोगिने उपायहरूबारे प्रशिक्षण दिइने उनले बताए ।

वार्षिकोत्सवकै अवसरमा टेलिकम कार्यालय परिसरमा आगामी माघ १८ देखि २२ गतेसम्म सप्ताहव्यापी कार्यक्रम सञ्चालन हुनेछ । सो अवसरमा विद्यार्थीहरूका लागि विशेष ‘एफटिटिएच स्टुडेन्ट अफर’ प्रवर्द्धन गरिनेछ । साथै, सेवाग्राहीले अत्याधुनिक प्रविधि ‘वाइफाइ–६’ र ‘एक्सेस प्वाइन्ट’ को प्रत्यक्ष अनुभव लिनुका साथै आवश्यक परामर्श पनि पाउनेछन् ।

टेलिकमले ग्राहकलाई डिजिटल सेवामा अभ्यस्त गराउन ‘एनटी एप’ डाउनलोड अभियान र महिनाभर चल्ने ‘क्लिक एण्ड विन’ लक्की ड्र प्रतियोगिता पनि आयोजना गर्ने भएको छ । टेलिकम पोखराका बजार शाखा प्रमुख महेन्द्रप्रसाद रिमालका अनुसार यो योजनाअन्तर्गत टेलिकम कार्यालयमा फोटो खिचेर सामाजिक सञ्जालमा सेयर गर्ने ग्राहकले आकर्षक उपहार जित्न सक्नेछन् ।