पोखरा ।  नेपाल डेरी एसोसिएसन गण्डकी प्रदेशको अध्यक्षमा प्रवीण कँडेल सर्वसम्मत चयन भएका छन् । सोमबार पोखरामा सम्पन्न एसोसिएसनको साधारण सभाले कँडेलको अध्यक्षतामा नयाँ प्रदेश कार्यसमिति चयन गरेको हो ।

नवनिर्वाचित कार्यसमितिको उपाध्यक्षमा शान्तिकुमारी सिग्देल, सचिवमा निर्मल भण्डारी र कोषाध्यक्षमा सन्तोष बजगाईं चयन भएका छन् । सदस्यमा आनन्द बजगाईं चुनिएका छन् । कार्यसमितिमा निवर्तमान अध्यक्षका रूपमा शिवहरि आचार्य रहनेछन् । बाँकी दुई सदस्य पछि मनोनीत गरिने एसोसिएसनले जनाएको छ ।

कार्यक्रममा एसोसिएसनका केन्द्रीय सल्लाहकार सुरेशबहादुर श्रेष्ठले गण्डकी प्रदेशमा दुग्ध उद्योगको प्रवर्द्धन र किसान तथा उद्योगीबीचको समन्वयलाई अझ सुदृढ बनाउनुपर्नेमा जोड दिए । अर्का सल्लाहकार ज्ञानेन्द्र बजगाईंले नवनिर्वाचित टोलीलाई शुभकामना दिँदै संस्थाको विकासमा सक्रिय भूमिका निर्वाह गर्ने प्रतिबद्धता व्यक्त गरे ।

निवर्तमान अध्यक्ष शिवहरि आचार्यको अध्यक्षतामा सम्पन्न कार्यक्रममा केन्द्रीय सदस्य राम बराललगायतको उपस्थिति थियो । कार्यक्रमको समापन गर्दै आचार्यले आगामी माघ ६ र ७ गते हुने एसोसिएसनको केन्द्रीय महाधिवेशनमा सहभागी हुन सबै सदस्यलाई आह्वान गरे । साधारण सभाले प्रदेशस्तरमा दुग्ध क्षेत्रका साझा समस्या समाधान गर्न र संस्थालाई थप सशक्त बनाउने संकल्प गरेको छ ।