लेखनाथ ।
सामुदाय प्रहरी साझेदारी कार्यक्रम अन्तर्गत लेखनाथ सामुदायिक सेवा केन्द्र एवं सामुदायिक प्रहरी सेवाको आयोजना र इलाका प्रहरी कार्यालय शिशुवाको सहकार्यमा औषधी व्यवसायीसँग अन्तरक्रया भएको छ । पोखरा २६ देखि ३३ र रुपा गाउँपालिकाभित्र सञ्चालनमा रहेका औषधी व्यवसायीसँग लागुऔषध नियन्त्रणबारे छलफल भएको हो ।

कार्यक्रममा रुपा गाउँपालिका अध्यक्ष नवराज ओझाले कुलतको पहिलो चरण सुर्ती र चुरोट भएको र त्यसपछि क्रमशः लागुऔषधतर्फ अग्रसर हुने भएकाले यसको रोकथामका लागि औषधी व्यवसायीले ठूलो सहयोग गर्न सक्ने बताए । औषधी व्यवसायि संघ गण्डकी प्रदेश अध्यक्ष केसरी तिवारी, पोखरा २९ का अध्यक्ष श्रीप्रसाद गुरुङ, इलाका प्रहरी कार्यालय शिशुवाका प्रमुख प्रहरी नायब उपरीक्षक श्रवणकुमार विकलगायतले बोलेका थिए ।

लेखनाथ सामुदायिक सेवा केन्द्र एवं सामुदायिक प्रहरी सेवाका अध्यक्ष गंगा खनालको अध्यक्षतामा भएको कार्यक्रममा कोषाध्यक्ष कृष्णप्रसाद ओझा, सदस्य रामकृष्ण खनाल, सदस्य सुमित्रा बन्जरा, केशवराज ढुंगाना र नवराज पौडेलले जुनसुकै कुलतबाट टाढै रहन आग्रह गरे । कार्यक्रममा लागुऔषध नियन्त्रण ब्युरो प्रमुख विद्याधर त्रिपाठीले सहजीकरण गरेका थिए ।