समाधान संवाददाता
दमौली

गण्डकी प्रदेशको मनाङदेखि प्रदेश ५ को लुम्बिनी जोड्ने बुद्धशान्ति पदमार्ग विकासका लागि व्यास नगरपालिकाले चासो देखाएको छ । पदमार्गका बारेमा जानकारी गराउँदै पदमार्ग विकासका लागि राष्ट्रिय एवं अन्तर्राष्ट्रिय सरकारी एवं गैरसरकारी संघसंस्थाको सहयोग, सहभागिता र प्रतिबद्धता जनाउने उद्देश्यसहित नगरपालिकाले पदमार्ग अन्तर्गत पर्ने स्थानीय तहका प्रमुख एवं प्रतिनिधिलाई बन्दीपुरमा भेला गराएर अन्तरजिल्ला कार्यशाला गोष्ठि गरेको छ ।

पदमार्गको विकासका लागि संघ, प्रदेश र स्थानीय तहसम्म समन्वय एवं सहकार्यका लागि वातावरण सिर्जना गर्न कार्यशाला गरिएको व्यास नगरपालिकाका प्रमुख वैकुण्ठ न्यौपानेले जानकारी दिए ।

‘पदमार्गलाई राष्ट्रिय तथा अन्तर्राष्ट्रिय पर्यटकहरुको चाहना र इच्छा अनुसार विविध अनुभव आदानप्रदान गर्न र गण्डकी प्रदेशकै प्रमुख पदमार्गको रुपमा स्थापित गर्न आवश्यक छ,’ न्यौपानेले भने, ‘पदमार्गमा पर्ने जिल्लाहरुको अर्थतन्त्र, संस्कृति तथा विश्व शान्तिका लागि योगदान पु¥याउने महत्वपूर्ण माध्यमको रुपमा यो पदमार्ग विकसित हुन सक्छ ।’

प्राकृतिक एवं सांस्कृतिक सम्पदाहरुको पहिचान, संरक्षण तथा प्रबद्र्धन गरी ग्रामीण पर्यटन विकासका लागि स्थानीय समुदायको समृद्धि र सुसंस्कृति अभिवृद्धिका लागि पदमार्गले सहयोग पुर्‍याउने भएकोले यसबारेमा छलफल गर्न आवश्यक रहेको नगरप्रमुख न्यौपानेले बताए ।

मध्यनेपाल पर्यटन विकास समितिका अध्यक्ष हरिसिं गुरुङका अनुसार बुद्धशान्ति पदमार्गको विकासका लागि नेपाल भ्रमण वर्ष सन् २०११ मा जिल्ला प्रशासन कार्यालय तनहुँको आयोजना तथा पर्यटन विकास समितिको समन्वयमा स्थलगत अवलोकन भ्रमण गरिएको थियो । जिल्ला विकास समितिको सहयोगमा आ.व. ०७२÷७३ मा तनहुँ र लमजुङको सीमाना कुञ्छाभञ्ज्याङदेखि स्याङ्जाको कोल्मा बराहाचौरसम्म १०९ किमि विस्तृत सर्भे समेत सम्पन्न भएको गुरुङले जानकारी दिए ।

जिल्ला विकास समितिकै सक्रियतामा विसं २०७२ असार १८ र १९ गते तनहुँमा बुद्धशान्ति पदमार्गको सम्बन्धमा स्थानीय निकाय अन्तरजिल्ला समन्वय बैठक सम्पन्न भएको थियो ।

पदमार्ग अन्तर्गत मनाङको चामे, लमजुङको मस्र्याङ्दी, क्होलासोंथर, बेशीशहर, सुन्दरबजार, तनहुँको भानु, व्यास, बन्दीपुर, म्याग्दे, शुक्लागण्डकी, स्याङ्जाको पुतलीबजार, भीरकोट, वालिङ, कालीगण्डकी, पाल्पाका तानसेन र रुपन्देहीको बुटवलका स्थानीय तह समेटिएको छ ।

बुद्धशान्ति पदमार्गको उद्गम गण्डकी प्रदेशभित्र भएकोले यसको पहल प्रदेशबाटै हुनुपर्दछ भन्ने मान्यताका साथ नगरपालिकाले पहल सुरु गरेको गुरुङले जानकारी दिए । ‘आफ्नो नगरपालिकाभित्र गर्नुपर्ने प्रारम्भिक कार्यका लागि नगरपालिकाको पहल र पदमार्गमा पर्ने अन्य पालिकाहरुसँगको समन्वय प्रशंसनीय छ,’ उनले भने ।

कार्यशाला तनहुँका संघीय सांसद केदार सिग्देलले पदमार्गले २ प्रदेश जोड्ने भएकोले यसको छुट्टै महत्व रहेको भन्दै यसमा संघीय सरकारको पनि अपनत्व रहने बताए । सांसद कृष्णकुमार श्रेष्ठले पदमार्गको विकासका लागि संघीय सरकार मार्फत् पहल गर्ने बताए । राष्ट्रिय सभा सदस्य प्रकाश पन्तले बुद्धशान्ति पदमार्गको प्रचारप्रसार गर्दै यसलाई विश्वकै पर्यटकको आकर्षणको केन्द्रविन्दु बनाउनुपर्ने बताए ।

गण्डकी प्रदेशका उद्योग, पर्यटन, वन तथा वातावरणमन्त्री विकास लम्सालले बुद्धशान्ति पदमार्गलाई स्थानीय तहसँग जोडेर विकास गर्नुपर्नेमा जोड दिए । बुद्धशान्ति पदमार्ग अन्तर्गत पर्ने स्थानीय तहले पदमार्ग विकासका लागि काम गर्नुपर्ने र उक्त काममा सहकार्य गर्न प्रदेश सरकार तयार रहेको मन्त्री लम्सालले बताए । ‘पदमार्गको विकासका लागि स्थानीय तहले प्रस्ताव ल्याए प्रदेश सरकार त्यसमा सहयोग गर्न तयार छ,’ मन्त्री लम्सालले भने ।

गण्डकी प्रदेशका आन्तरिक मामिला तथा कानुनमन्त्री हरिबहादुर चुमानले पदमार्गको विकासका लागि इच्छाशक्तिको खाँचो रहेको भन्दै गण्डकी प्रदेशलाई विश्वमै चिनाउने पदमार्गलाई प्रदेश सरकारले लगानी गर्ने बताए ।

गण्डकी प्रदेश सांसद रामबहादुर गुरुङ, डोबाटे विक, जिल्ला समन्वय समिति तनहुँका प्रमुख शान्तिरमण वाग्ले, वेशीशहर नगरपालिकाका प्रमुख गुमानसिं अर्याल लगायतले पदमार्ग क्षेत्र पर्ने स्थानीय तहले बजेट विनियोजन गर्नुपर्नेमा जोड दिए ।

कार्यक्रममा मध्यनेपाल पर्यटन विकास समितिका अध्यक्ष गुरुङले बुद्धशान्ति पदमार्गको बारेमा कार्यपत्र प्रस्तुत गरेका थिए । उक्त कार्यपत्रमाथि नेपाल पर्यटन बोर्डका प्रबन्धक लीला बानियाँ र संविधानसभा सदस्य रामचन्द्र पोख्रेलले टिप्पणी गरेका थिए ।

उक्त कार्यशालामा तनहुँ, लमजुङ, स्याङ्जा, पाल्पा, रुपन्देही लगायतका स्थानीय तहका प्रतिनिधिको सहभागिता थियो । मनाङको टिमाङभ्याली हुँदै लमजुङ, तनहुँ, स्याङ्जा, पाल्पा हुँदै रुपन्देहीको लुम्बिनीको पुगेर टुंगिने उक्त पदमार्ग ३ सय ५० किमी छ ।

यस पदमार्ग अन्तर्गत तनहुँको ढोरदेखि स्याङ्जाको कोल्मा बराहाचौरसम्म मिलेनियम ट्रेकको रुपमा विकास भइसकेको छ भने रानीघाट हुँदै पाल्पा र स्याङ्जालाई जोड्ने रानीमहल ट्रेकमा पनि पर्यटकहरुको आगमन सुरु भइसकेको छ । लमजुङ र मनाङमा पर्ने क्षेत्रहरु यस अघि नै पर्यटकीय क्षेत्रको रुपमा सुपरिचित छन् ।