पोखरा । नेपाल टुरिजम एण्ड होटल म्यानेजमेन्ट कलेज र काठमाडौं विश्वविद्यालय स्कुल अफ म्यानेजमेन्टबीच संस्थागत विकास र आपसी हितलाई प्रवर्द्धन गर्न सहकार्यको लागि समझदारी पत्रमा हस्ताक्षर भएको छ।

पोखरामा मंगलबार सम्पन्न उक्त कार्यक्रममा दुवै संस्थाले शैक्षिक, अनुसन्धान तथा व्यवसायिक गतिविधिहरूमा सहकार्य गर्ने निर्णय गरेका छन् ।

समझदारीको मुख्य उद्देश्य एक अर्काको संस्थागत शक्ति, अनुभव र स्रोतहरूको अधिकतम प्रयोग गर्दै व्यवसायिक व्यवस्थापन स्रोत र अभ्यासहरूको विकास र उपयोगमा योगदान पुर्‍याउनु रहेको छ । समझदारी पत्रमा नेपाल टुरिजम एण्ड होटल म्यानेजमेन्ट कलेजको तर्फबाट कलेजका अध्यक्ष अशोक पालिखे र प्राचार्य प्रकाश रेग्मी, तथा काठमाडौं विश्वविद्यालय स्कुल अफ म्यानेजमेन्टको तर्फबाट डिन प्राडा विजय केसीले हस्ताक्षर गरेका छन्।

सहकार्यले दुवै संस्थालाई शैक्षिक र व्यावसायिक क्षेत्रमा थप प्रभावकारी बनाउन महत्वपूर्ण योगदान पुर्‍याउने अपेक्षा गरिएको अध्यक्ष पालिखेले बताए ।

सहकार्यका मुख्य दायरा :

शिक्षण, तालिम, अनुसन्धान तथा परामर्श कार्यक्रमहरूमा सहकार्य ।
संयुक्त अनुसन्धान र व्यवसायिक कार्यक्रमहरूको सञ्चालन ।
संकाय आदानप्रदान कार्यक्रम ।
ज्ञानको विकास र प्रसारका लागि शैक्षिक, नीति र व्यवसायिक सम्मेलन, सेमिनार तथा वकालत कार्यक्रम सञ्चालन ।