लेखनाथ । पोखरा महानगरपालिका वडा नम्बर २७ को शिक्षा समितिले पोखरा र आसपासका विद्यालयहरूलाई समेटेर बृहत् हाजिरीजवाफ प्रतियोगिता र शैक्षिक प्रदर्शनी गर्ने भएको छ । विद्यालयहरूबीच शैक्षिक सहकार्य बढाउने र विद्यार्थीहरूको प्रतिभा प्रदर्शनको अवसर सिर्जना गरी शैक्षिक गतिविधि बढाउन सहज हुने उद्देश्यले आगामी फागुन २ र ३ गते मावि स्तरीय बृहत् हाजिरीजवाफ प्रतियोगिता र शैक्षिक प्रदर्शनी आयोजना गरिने भएको हो ।

हाजिरीजवाफ प्रतियोगिता र शैक्षिक प्रदर्शनीका बारेमा जानकारी दिने उद्देश्यले मङ्गलवार आयोजित छलफल कार्यक्रममा शिक्षा समितिका सदस्य तथा बृहत् शैक्षिक प्रदर्शनी प्रतियोगिताका संयोजक यामबहादुर रोकाले फागुन २ गते हाजिरीजवाफ प्रतियोगिता लक्ष्मी आदर्श माविमा हुने र शैक्षिक प्रदर्शनी फागुन ३ गते डायमण्ड माविमा हुने जानकारी गराएका थिए ।
दर्ता शुल्क निःशुल्क रहेको तथा पाठ्यक्रममा आधारित शैक्षिक प्रदर्शनीमा पोखरा आसपास र छिमेकी जिल्लाका करिब ५० भन्दा बढी विद्यालयका विद्यार्थीहरूको सहभागिता रहने अपेक्षा गरिएको छ ।

यसैबीच कार्यक्रममा शिक्षा समितिका सदस्य शिवमणि भण्डारीले हाजिरीजवाफ प्रतियोगितामा प्रथम हुनेलाई १० हजार, द्वितीयलाई सात हजार, तृतीयलाई पाँच हजार र सान्त्वनालाई तीन हजार रुपैयाँ पुरस्कार प्रदान गरिने तथा शैक्षिक प्रदर्शनीतर्फ प्रथम हुनेलाई १५ हजार, द्वितीयलाई १० हजार, तृतीयलाई सात हजार र सान्त्वनालाई पाँच हजार रुपैयाँ पुरस्कार प्रदान गरिने बताएका थिए ।

कार्यक्रममा पोखरा महानगरपालिका वडा नम्बर २७ का वडाध्यक्ष पूर्णकुमार गुरुङले दुई दिने कार्यक्रमलाई सफल पार्न सबैलाई अनुरोध गरेका थिए भने कार्यक्रममार्फत विद्यार्थीहरूले विज्ञान र प्रविधि, वातावरण, कृषि, सामाजिक विज्ञान, भाषा र विज्ञानका बारेमा जानकारी पाउने विश्वास व्यक्त गरेका थिए । साथै वडाध्यक्ष गुरुङले वडाको लगानीमा लक्ष्मी आदर्श माविमा पाँच विधामा प्राविधिक शिक्षाको पढाइ सञ्चालन हुँदै आएको बताएका थिए ।