पोखरा ।
पोखरा महानगरपालिका दोस्रो अन्तर क्लब पुरुष टि–२० क्रिकेट प्रतियोगिता २०८१ अन्तर्गत बुधबार भएको खेलमा लेखनाथ क्रिकेट क्लब विजयी भएको छ । लेखनाथले लेकसाइड क्रिकेट क्लबलाई २८ रनले पराजित गर्दै प्रतियोगितामा विजयी सुरुवात गरेको हो ।

लेकसाइड क्रिकेट क्लबले टस जितेर पहिले फिल्डिङ रोजेपछि ब्याटिङमा उत्रिएको लेखनाथ क्रिकेट क्लबले निर्धारित २० ओभरमा ८ विकेट गुमाएर १ सय ६४ रन बनाएको थियो । लेखनाथका लागि सचिन पौडेलले २३ बलमा सर्वाधिक ३४ रन र साहिल पौडेलले १६ बलमा २६ रनको योगदान दिए ।

लेकसाइडका रवि गुरुङ र केशव सुनारले समान २ विकेट लिए पनि लेखनाथलाई दवाबमा राख्न असफल भए । १ सय ६५ रनको लक्ष्य लिएर जवाफी ब्याटिङमा उत्रिएको लेकसाइड निर्धारित २० ओभरमा ७ विकेट गुमाएर १ सय ३६ रनमा सीमित भएपछि पराजय बेहोर्‍यो ।

लेकसाइडका लागि निजामुद्दिन शेखले ४० बलमा ३२ रन र चन्दन पेलाले २४ बलमा २३ रनको योगदान दिएपनि हार टार्न सकेनन् । लेकसाइडलाई सस्तैमा समेट्न लेखनाथका दीपक बराल र विशाल पौडेलले समान २ विकेट लिए । बुधबारको खेलमा विजयी टिम लेखनाथका दीपक बराल म्यान अफ दी म्याच घोषित भए ।

प्रतियोगिता अन्तर्गत बिहीबारको पहिलो खेल गण्डकी क्रिकेट क्लब र कास्की क्रिकेट क्लब तथा दोस्रो खेल राइजिङ क्रिकेट क्लब र सांग्रिला क्रिकेट क्लबबीच हुने आयोजक पोखरा महानगरपालिका क्रिकेट संघका अध्यक्ष वीरेन्द्र पुनले जानकारी दिए ।