तनहुँ ।
तनहुँमा पर्यटकीय गाउँ भुजिकोट क्षेत्रको प्रचार गर्न नयाँ बर्ष २०८२ को पहिलो दिन ‘दोस्रो भुजिकोट स्थानथोक राष्ट्रिय खुला उकालो दौड प्रतियोगिता’ हुने भएको छ । अन्नपूर्ण युवा क्लब कोत्रेको आयोजनामा प्रतियोगिता हुने भएको हो ।

आयोक क्लबका पूर्व अध्यक्ष एवं कार्यक्रम संयोजक खेम गुरुङले भुजीकोटसँगै समग्र वडामा पर्यटकीय गतिविधि सञ्चालन गर्न कार्यक्रम आयोजना गरिएको बताए । उनले १८ देखि ४५ वर्ष उमेर समूहमा महिला र पुरुष सहभागी हुने गरी खुला दौड प्रतियोगिता हुने जानकारी दिए ।

शुक्लागण्डकी नगरपालिका वडा न २ को पर्यटकीय क्षेत्र भुजीकोट, स्थानथोकसहित यहाँ रहेका पुराना सांस्कृतिक बस्ती, आदिवासी समुदायको संस्कृति, घरबास कार्यक्रम, ऐतिहासिक स्थल अवलोकन र दृश्यावलोकनमार्फत यस क्षेत्रको प्रचार गर्न प्रतियोगिता सफल हुने संयोजक गुरुङ्गको विश्वास छ ।

क्लब अध्यक्ष अनिल खनालको अध्यक्षतामा भएको कार्यक्रममा दौडसहित गुलेली हान्ने, कुखुराको भाले समाउने र सांस्कृतिक प्रस्तुति लगायतका कार्यक्रम सञ्चालन गरिने जनाइएको छ । अध्यक्ष खनालले देशभरका २ सय जना धावक सहभागी गराउने बताए । उनले उत्कृष्ट २० जनासम्मलाई मेडलसहित सम्मान गर्ने उल्लेख गरे ।

कार्यक्रमका प्रवक्ता तीर्थराज खनालले प्रतियोगितामा सहभागि भई विजेता हुने प्रथमसहित पाँचौसम्मका धावकलाई क्रमश ३३ हजार ३ सय ३३, २२ हजार २ सय २२, ११ हजार १ सय ११, ५ हजार ५ सय ५५ र ३ हजार ३ सय ३३ नगदसहित सम्मान गरिने जानकारी दिए । कोत्रे चोकदेखि स्थानथोकसम्मको ९ किलोमिटरमा हुने जनाउँदै प्रवक्ता खनालले प्रतियोगिता गर्न तीन लाख लाग्ने अनुमान सुनाए ।

क्लबले यसअघि २०७५ मा पनि भुजीकोट उकालो दौड प्रतियोगिता सञ्चालन गरेको थियो । कोरोना महामारी लगायतका विभिन्न कारणले रोकिएको प्रतियोगिता अब बर्सेनी आयोजना गर्ने क्लबले जनाएको छ । शुक्लागण्डकी नगरपालिका २ भुजीकोट–स्थानथोकबाट पोखराका तालतलैयादेखि हिमालयका सुन्दर दृश्य, विभिन्न जिल्लाका दृश्यवलोकन, राष्ट्रिय फूल लाँलीगुरास अवलोकनका साथै ग्रामीण परिवेश नियाल्न सकिन्छ ।