पोखरा । पोखरा १३ आर्वास्थित नवदुर्गा युवा क्लबको आयोजनामा शनिबारदेखि तेस्रो नवदुर्गा कप भलिबल प्रतियोगिता सुरु भएको छ । रतन पाण्डे माविको खेल मैदानमा सञ्चालित प्रतियोगिता सोमबारसम्म चल्नेछ ।

गण्डकी प्रदेशका १६ युवा समूहले प्रतिस्पर्धा गर्ने प्रतियोगिताका विजेताले नगद ४५ हजार, उपविजेताले नगद ३० हजार, सिल्ड, मेडल तथा प्रमाणपत्र प्राप्त गर्ने छन् । प्रतियोगितामा उत्कृष्ट प्लेयर, उत्कृष्ट डिफेन्डर र उत्कृष्ट सेटरले पनि पुरस्कार पाउने छन्।
प्रतियोगिताबाट बचत भएको रकम आर्वाको दादरामा निर्माणाधीन खेलकुद मैदान निर्माणमा खर्च गरिने क्लब अध्यक्ष मनोज बरालले बताए । प्रतियोगिता पोखरा महानगरपालिका वडानं १३ का वडाध्यक्ष किरण बरालले उद्घाटन गरे । उनले नवदुर्गा कप भलिबल प्रतियोगिताको मुख्य प्रायोजक नै वडा कार्यालयले गर्ने जानकारी दिँदै उनले आगामी वर्षमा पनि वडाले निरन्तरता दिदै जाने प्रतिबद्धता जनाए ।

उनले सुविधा सम्पन्न खेलकुद मैदान अभावका कारण खेलकुदप्रति युवाको आकर्षण नभएको तर्क गर्दै उनले आर्वाका दुई स्थान दादरा र दोबाटोमा खेलकुद मैदान बनाउन सुरू गरिएको सुनाए ।

कार्यक्रममा रतन पाण्डे माध्यामिक बिद्यालय व्यवस्थापन समिति अध्यक्ष विष्णुप्रसाद बराल, नवदुर्गा टोलका अध्यक्ष सूर्यप्रसाद बराल, खेल संयोजक सन्त थापा, क्लब उपाध्यक्ष रजनी बराल, सचिव सुदर्शन बराल लगायतले बोलेका थिए । कार्यक्रममा गायक अमर धितालले सांस्कृतिक प्रस्तुति राखेका थिए ।