समाधान संवाददाता, पोखरा

आइएनएफ नेपालले ६७ औं वार्षिकोत्सव कार्यक्रम मनाएको छ । कार्यक्रमलाई सम्बोधन गर्दै पोखरा महानगरपालिकाका प्रमुख मानबहादुर जिसीले अति विपन्न वर्गका मानिसलाई लक्ष्य गरी मानव सेवामा जुटिरहेको आइएनएफ अझ प्रगतितर्फ उन्मुख होस् भन्ने कामना गरे । सोही अवसरमा नव निर्मित बहुउद्देश्यीय सिकाइ केन्द्रको समेत प्रमुख अतिथि जिसीले उद्घाटन गरेका थिए ।

विविध गीत तथा नृत्य प्रस्तुत गरिएको कार्यक्रममा सप्ताहव्यापी खेलुकद कार्यक्रम अन्तर्गत सम्पन्न फुटबल, सालु, म्याराथन, व्हिल चियर रेस लगायत विधातर्फ विजेतालाई अतिथिले पुरस्कार वितरण गरेका थिए । २५ वर्षभन्दा बढी सेवा गर्ने चार जना कर्मचारीलाई कदर–पत्र र दोसल्लाले सम्मान गरिएको थियो । कार्यक्रममा आइएनएफका उपाध्यक्ष राजेन्द्रकुमार अधिकारीले स्वागत मन्तव्य राखेका थिए । कार्यकारी निर्देशक कृष्ण अधिकारीले संस्थाको इतिहास र हालका गतिविधि माथि प्रकाश पारेका थिए ।

बोर्ड सल्लाहकारद्वय फिल मोरिस र डा. दीपेन्द्र गौतमको उपस्थितिमा सम्पन्न कार्यक्रममा वडा नं. १५ का वडाध्यक्ष प्रकाश पौडेल, वडा नम्बर १ की वडाध्यक्ष शारदा पराजुली, पोखरेली ख्रिष्टिय समुदायका अध्यक्ष हरिराम घिमिरे र आइएनएफ अन्तर्राष्ट्रियका अध्यक्ष फिल लिंडस्लेको विशेष आतिथ्यता रहेको थियो । कार्यक्रम आइएनएफ नेपालका अध्यक्ष रामचन्द्र तिमोथीको सभापतित्त्वमा सम्पन्न भएको थियो ।