पोखरा ।
असल छिमेकी सहयोग संघ नेपाल (गोनेसा)ले सामुदायिक विद्यालयमा अध्ययनरत विपन्न परिवारका बालबालिकालाई विद्यालय पोशाक, झोला तथा शैक्षिक सामग्री वितरण गरेको छ ।

बालबालिका विद्यालय भर्ना सहयोग कार्यक्रम अन्तर्गत छोरेपाटन माविका ७२, जानकी आधारभूत विद्यालयका ४१ र विन्ध्यबासिनी माविका २७ गरी १ सय ४० विद्यार्थीलाई विद्यालय पोशाक, स्टेसनरी र झोला वितरण गरेको संस्थाका अध्यक्ष रामप्रसाद सुवेदीले जानकारी दिए । उनले शैक्षिक सत्रमा विभिन्न २१ विद्यालयका ४ सय १८ बालबालिकालाई पोशाक तथा शैक्षिक सामाग्री वितरण गरिने बताए ।

गण्डकी प्रदेश सभाका सदस्य भीम कार्कीले शिक्षा स्वास्थ्य र पोषणको क्षेत्रमा राज्यका निकायले गर्नुपर्ने काम सामाजिक संघ संस्थाले गरेको बताए । उनले कठिन परिस्थिति तथा विपन्न वर्गका बालबालिकालाई भएको सहयोगले अध्ययनको लागि मद्दत पुग्ने चर्चा गरे ।

‘विपन्न वर्गका बालबालिकालाई सम्पन्न बनाउन र विद्यालयसम्म पहुँ च पुर्‍याउन संस्थाको सहयोग रहेको छ,’ उनले भने, ‘अभिभावकको आय आर्जन, उद्यमशीलताको विकास र रोजगारी सिर्जना गर्न सामाजिक संस्थाको योगदान रहेको छ ।’ उनले समाजमा रहेको विद्यमान विभेद र आर्थिक असमानता हटाउन संस्थाको योगदान रहेको जनाए । उनले विद्यार्थीलाई असल संस्कार र योग्य नागरिक बनाउन आवश्यक रहेको बताए ।

पोखरा १७ की वडाध्यक्ष राधिका शाही योगीले बाल बालिकाको शिक्षा र स्वास्थ्यको क्षेत्रमा संस्थाले अभिभावकको भूमिका खेलेको चर्चा गरिन् । संस्थाको सहयोगले आर्थिक अवस्था कमजोर भएका बालबालिकालाई पढ्न सहयोग पुगेको उल्लेख गर्दै उनले सरकारले गर्नुपर्ने काम संस्थाले गरेको बताइन् ।

गोनेसाका अध्यक्ष सुवेदीले समुदाय र विद्यालय स्तरको बाल विकास केन्द्रमा पढेर कक्षा १ मा भर्ना हुनेदेखि कक्षा ११ र १२ सम्म अध्ययन गर्ने विद्यार्थीलाई विद्यालय भर्ना र अध्ययनका लागि आवश्यक पर्ने शैक्षिक सामाग्री सहयोग गर्दै आएको जानकारी दिए । उनले विद्यालय भर्ना सहयोग कार्यक्रमको सेवा लिएका विद्यार्थीले आवश्यक स्वास्थ्य उपचार निशुल्क रुपमा पाएको उल्लेख गरे ।

दातृ निकाय भिस्पे इटालीको सहयोगमा भएको कार्यक्रममा गोनेसा पोखराका कार्यसमितिका सदस्य केशु भुजेल, शिवबुद्ध टोल विकास संस्थाका अध्यक्ष यमप्रसाद पौडेलले संस्थाले सामाजिक उत्तरदायित्व अन्तर्गत बाल बालिकालाई शैक्षिक सहयोग गरेको बताए ।