पोखरा ।
पोखरा महानगरपालिका वडा नम्बर १५ कोलपाटनमा बिहीबार मानवअधिकार र महिला अधिकारसम्बन्धी सचेतनामूलक कार्यक्रम भएको छ । पोखरा महानगरपालिका सामाजिक विकास महाशाखाको सहयोगमा इन्सेक गण्डकी प्रदेश पोखराले आयोजना गरेको कार्यक्रममा ५५ जनाको सहभागिता थियो ।

कार्यक्रममा इन्सेक गण्डकी प्रदेशका संयोजक शिव खकुरेलले मानव अधिकार, महिला मानव अधिकार, रक्षक सञ्जाल कास्कीका पूर्व अध्यक्ष सवनम शर्माले महिला अधिकार र जिल्ला प्रहरी कार्यालय कास्कीको महिला बालबालिका तथा ज्येष्ठ नागरिक सेवा केन्द्रका प्रमुख सरला ढकालले लैंगिक हिंसा र न्यूनीकरणका लागि भएका प्रयास तथा अनलाइन दुव्र्यवहारबाट बच्ने उपाय विषयमा सहजीकरण गरे ।

पोखरा १५ का वडाध्यक्ष तोरण बानियाँले मानवीय विकास नभएसम्म भौतिक पूर्वाधार विकासको अर्थ नरहने बताए । ‘पूर्वाधार विकासको अलवा मानवीय विकासका लागि वडा कार्यालयले ध्यान दिएको छ,’ उनले भने, ‘भौतिकसँगै मानवीय विकास नभएसम्म सन्तुलित विकास हुन सक्दैन ।’ उनले नागरिकको सशक्तीकरण र अधिकार भएको खण्डमा समग्र विकासमा सहयोग पुग्ने उल्लेख गरे ।

लैगिंक हिंसा, मानव बेचविखन र साइबर क्राइमबाट महिलालाई जोगाउन नसके विकासको अर्थ नरहने उनले उल्लेख गरे । उनले वडा कार्यालयले महिलाको नेतृत्व र सीप विकासको क्षेत्रमा काम गरेको जानकारी दिए । कोलपाटन आमा समूहका अध्यक्ष सावित्रा पौडेलले वडाका महिलाको क्षमता विकासका लागि कार्यक्रम फलदायी भएको टिप्पणी गरिन् ।