पोखरा ।

पोखरा १४ चाउथेमा अवस्थित कास्की मोडनाइज्ड एकेडेमीले यस वर्ष विद्यालयमा भर्ना भएका नयाँ विद्यार्थी तथा नवनियुक्त शिक्षकलाई स्वागत तथा सम्मान गरेको छ । एकेडेमीले प्रत्येक वर्ष नयाँ विद्यार्थी तथा शिक्षकलाई स्वागत तथा सम्मान गर्दै आएको छ ।

विद्यालयका संस्थापक प्राचार्य रामबहादुर मोचीले कास्की मोर्डनाइज्ड शैक्षिक ल्याब भएको र यहाँबाट विद्यार्थीले धेरै क्षेत्रका धेरै कुरा सिक्न र शिक्षकले सिकाएर नतिजा निकाल्न सक्ने बताए । उनले आफ्नो शैक्षिक योजना ठूलो भएकाले त्यसलाई सम्पन्न गर्न विद्यालयमा विस्तार गर्दै जाने उल्लेख गरे ।

विद्यालय व्यवस्थापन समिति अध्यक्ष राधा नेपालीले विद्यार्थीलाई आवश्यक हरेक कुराको व्यवस्थापन गरिएको जनाउँदै सकेसम्म युगको माग अनुसार अगाडि बढ्नुपर्ने विचार राखिन् । विद्यालयका सहप्राचार्य शिवलाल उपाध्यायले नवप्रवेशी शिक्षक तथा विद्यार्थीलाई नयाँ महसुुुस नगरी आफ्नो कार्य क्षेत्रमा लाग्न आग्रह गरे ।

कार्यक्रममा शैक्षिक प्रमुख शिवु ढकाल, मिलन तिमिल्सिना, गंगा आले, कल्पना गुर्माछन, निर्मला पहारी लगायतले बोलेका थिए । कार्यक्रममा विद्यार्थीले विभिन्न नृत्य तथा गायन प्रस्तुत गरेका थिए । कार्यक्रम सञ्चालन शिक्षक अनुराग अधिकारीको नेतृत्वमा विद्यार्थीहरुले गरेका थिए ।