पोखरा ।

पोखरा स्वास्थ्य विज्ञान प्रतिष्ठानको उपकुलपति पदका लागि १७ जनाले आवेदन दिएका छन् । स्वास्थ्य तथा जनसंख्या मन्त्रालय अन्तर्गतको सिफारिस समितिले तोकेको समयसीमा मंगलबार साँझ ५ बजेसम्म उनीहरूको आवेदन परेको हो ।

तत्कालीन उपकुलपति प्राडा डुकबहादुर क्षेत्रीको ४ वर्षे कार्यकाल गत चैत २० गते सकिएपछि प्रतिष्ठान नेतृत्वविहीन बनेको थियो । नेतृत्व रिक्त भएको करिब ३ महिनापछि मन्त्रालयले गत बुधबार सार्वजनिक सूचना जारी गर्दै इच्छुक तथा योग्य उम्मेदवारहरूबाट आवेदन आह्वान गरेको थियो ।

प्रतिष्ठानको नेतृत्व लिनका लागि प्राध्यापक डाक्टरदेखि विशेषज्ञ चिकित्सकसम्मले आफ्नो दाबेदारी प्रस्तुत गरेका छन् । आवेदन दिनेहरूमा प्राडा अर्जुन आचार्य, डा. प्रदीप घिमिरे, प्राडा माया लामा, प्राडा चण्डिका पण्डित, प्राडा भरतबहादुर खत्री, प्राडा राकेशकुमार वर्मा, प्राडा राजेश अधिकारी र प्राडा नारायण सिंह गुरुङ रहेका छन् ।

त्यसैगरी, प्राडा प्रेमराज ज्ञवाली, प्राडा विधाननिधि पौडेल, प्राडा ईश्वर शर्मा कँडेल, प्राडा दिपकराज पौडेल, डा. श्रीकृष्ण श्रेष्ठ, डा. कालु शर्मा सुवेदी, प्राडा विष्णुप्रसाद शर्मा, डा. रामेशराज कोइराला र डा. लक्ष्मी नारायण सिंहले पनि उपकुलपतिका लागि आफ्नो कार्ययोजनासहित आवेदन दर्ता गराएका छन् ।

सरकारले पोखरासँगै कर्णाली, बिपी कोइराला र पाटन स्वास्थ्य विज्ञान प्रतिष्ठानमा पनि उपकुलपति नियुक्तिको प्रक्रिया एकसाथ अघि बढाएको छ, जसले गर्दा स्वास्थ्य क्षेत्रमा नेतृत्व चयनको विषयले अहिले चर्चा पाएको छ ।

अब सिफारिस समितिले प्राप्त आवेदनहरूको मूल्यांकन प्रक्रिया अगाडि बढाउनेछ । समितिले आवेदकहरूको योग्यता, अनुभव र उनीहरूले पेस गरेको प्रतिष्ठान विकाससम्बन्धी रणनीतिक कार्ययोजनाको अध्ययन गरी उत्कृष्ट उम्मेदवारहरूको संक्षिप्त सूची (सर्टलिस्ट) तयार गर्नेछ । त्यसपछि उपकुलपतिका लागि ३ जनाको नाम कुलपतिसमक्ष सिफारिस गरिनेछ । सोही सिफारिसका आधारमा कुलपतिले एक जनालाई आगामी ४ वर्षे कार्यकालका लागि उपकुलपतिमा नियुक्त गर्ने कानुनी व्यवस्था छ ।